Түркия дүйсенбі күні Судандағы БҰҰ базасына жасалған, нәтижесінде алты бангладештік әскери қызметкер қаза тауып, сегіз адам жараланған ұшқышсыз ұшақ аппараты арқылы жасалған шабуылды айыптады.
Түркия Сыртқы істер министрлігі таратқан мәлімдемеде «Жантүршігерлік шабуылда қаза тапқан бангладештік сарбаздарға Алладан рақым, жараланғандарға шипа тілейміз», -делінген.
Министрлік Суданның бірлігі мен аумақтық тұтастығын сақтаудың маңызын атап өтіп, елде жалғасып жатқан қақтығыстарға бейбіт шешім табуға бағытталған күш-жігерге қолдауын қайталады.
Шабуыл Судан армиясы мен Жедел қолдау күштері арасындағы қақтығыс тоқтаусыз жалғасып жатқан кезде болды. 2023 жылдың сәуір айынан бері жалғасып келе жатқан қақтығыстар мыңдаған адамның қаза табуына, миллиондаған тұрғынның босқынға айналуына және әлемдегі ең ауыр гуманитарлық дағдарыстардың бірінің туындауына себеп болды.
Судан армиясы Жедел қолдау күштерін айыптады. Ал көтерілісші топ тарапынан әзірге ресми мәлімдеме жасалған жоқ.
Қаза тапқан әскерлер Судан мен көршілес Оңтүстік Судан басқаратын мұнайға бай әрі даулы шекара аймағында қызмет атқаратын БҰҰ-ның Абьей уақытша қауіпсіздік күштері құрамында болатын.
Өткен апта Оңтүстік Судан екі ел шекарасына жақын орналасқан Батыс Кордофандағы Хеглиг мұнай кен орнындағы қауіпсіздікті Оңтүстік Судан халықтық қорғаныс күштерінің бақылауына беру жөнінде Судан армиясы және Жедел қолдау күштерімен үшжақты келісімге қол жеткізгенін хабарлаған еді.
Аталған келісім Хеглигтегі мұнай нысандарының қауіпсіздігін Оңтүстік Судан халықтық қорғаныс күштеріне жүктейді.
БҰҰ-ның Абьей уақытша қауіпсіздік күштері миссиясының мерзімі өткен ай ұзартылған болатын.
