Еуропалық Одақ пен Қытай арасындағы кедендік тарифтерге байланысты шиеленістер жалғасып жатқан тұста Қытай басшысы мен Ирландия премьер-министрі екі ел арасындағы экономикалық ынтымақтастықты талқылады.
Қытай Халық Республикасының басшысы Си Цзиньпин мен Ирландия премьер-министрі Майкл Мартин дүйсенбі күні экономикалық байланыстарды нығайтумен қатар Қытай мен Еуропалық Одақ арасындағы қатынастарды да талқылады.
Мартин жексенбі күні Қытай астанасы Пекинге келді. Бұл — ирланд премьер-министрінің соңғы 14 жылда Қытайға жасаған алғашқы ресми сапары. Бес күнге созылатын бұл сапар аясында бірқатар ресми кездесу жоспарланған.
Си Цзиньпин өз сөзінде: «Өзара құрмет, теңдік және ортақ пайда — Қытай мен Ирландия арасындағы қатынастардың ұзақ мерзімді әрі тұрақты дамуы барысында қалыптасқан құнды тәжірибе»,- деді.
Бейсенбіге дейін жалғасатын сапар барысында Мартин Шанхай қаласында жоғары лауазымды қытайлық шенеуніктермен және бизнес өкілдерімен де кездеседі.
Ирландияның Азиядағы ең ірі экономикалық серіктесі
Си Цзиньпин Ирландияның ашық нарықтарды қолдайтынын атап өтіп, екі ел де жаһандық саудаға ынтымақтастық негізінде пайда көріп отырғанын айтты.
Жылдық сауда айналымы шамамен 42 миллиард АҚШ долларын құрайтын Қытай — Ирландияның Азиядағы ең ірі экономикалық серіктесі әрі әлем бойынша бесінші орындағы сауда серіктесі.
Си Цзиньпин Ирландия премьер-министрінің пікірлерін қолдай отырып, Пекиннің жасанды интеллект, цифрлық экономика, денсаулық сақтау және білім беру салаларымен қатар түрлі бағытта ынтымақтастықты кеңейтуге мүдделі екенін жеткізді.
Екі ел басшысы да көпжақтылыққа және БҰҰ-ның беделіне берік екенін қайта растап, Қытай мен ЕО арасындағы байланыстарды кең ауқымда дамыту мәселесін талқылады.
Мартиннің сапары Еуропалық Одақ пен Қытай арасындағы кедендік баждар мен тарифтерге байланысты жалпы шиеленіс кезеңіне тұспа-тұс келеді: Қытайдың жақында енгізген кейбір ЕО сүт өнімдері мен электроавтомобильдерге салған баждары сауда қатынастарына қосымша қысым түсіріп отыр.
