Түркия Республикасының Президенті Режеп Тайып Ердоған аймақта анағұрлым нәзік кезеңнің басталғанын атап өтіп, Израильдің бейбітшіліктің ең кішігірім ықтималдығына да қарсы шығып отырғанын айтты.
Түркия Ұлы Ұлттық Мәжілісіндегі (ТҰҰМ) Әділет және даму (АК) партиясының фракциялық жиынында сөйлеген сөзінде Ердоған: «Израильдің бейбітшіліктің ең кішігірім ықтималдығына да төзе алмайтынын білеміз», — деді.
Аймақтағы соңғы оқиғаларға тоқталған Ердоған израильдік саясаткерлердің соңғы 10 күнде жасаған мәлімдемелері «қарсымызда парасаттылықпен әрекет ететін мемлекет емес, бақылаудан шыққан радикалдар тобының бар екенін» көрсететінін білдірді.
Ердоған: «Жағдайдың ушыққаны соншалық, қазір елдің бәрі бір-бірін аз адам өлтірді, аз қан төкті деп айыптауда», — деді.
Израильдегі кейбір топтардың аймақта қарудың үні өшкенін қаламайтынын және қарқынды дипломатиялық күш-жігердің нәтижесінде қол жеткізілген соңғы келісімге нұқсан келтіруге тырысып жатқанын айтқан Ердоған Израильді «террор мен басқыншылықты мемлекеттік саясатқа айналдырған қырғын желісі» деп атады. Сондай-ақ оның соңғы 10 күнде барлық тараптардың талпынысымен қамтамасыз етілген уағдаластықты бұзу үшін қолдан келгеннің бәрін істеп жатқанын жеткізді.
Ердоған жауапты тұлғалардың мақсаттарына жеткенге дейін бұл бағыттағы әрекеттерін жалғастыра беретінін де сөзіне қосты.
«Аймағымызға бейбітшілік келетін болса, ол Израильге қарамастан келеді. Аймағымызда тыныштық орнайтын болса, бұл Израильдің арандатушылықтарына қарамастан жүзеге асады», — деген Ердоған «Бұл қырғын желісі не істесе де, аймағымызда бейбітшіліктің, әділдіктің, тұрақтылық пен өркендеудің салтанат құруына бөгет бола алмайды», — деді.
Ердоған Түркияның бейбітшілік орнатудың ешбір мүмкіндігін қалт жібермеу үшін дипломатиялық талпыныстарды қолдауды жалғастыратынын айтты.
«Түркия ретінде бейбітшілік орнатудың ең кішігірім мүмкіндігін де бағалау тұрғысынан бізге қандай міндет жүктелсе, оны орындаудан аянбаймыз», — деген президент Анкараның алдағы кезеңде де Иранды қамтитын дағдарыстың тұрақты шешімін табуын көздейтін күш-жігерге қолдау көрсетуді жалғастыратынын жеткізді.
