Еуропа Одағының Сыртқы істер және қауіпсіздік саясаты жөніндегі жоғары өкілі Газада көмек сұраған бейбіт тұрғындардың өлтірілуін «ақтауға болмайтын жағдай» деп сипаттады.

Каджа Каллас «X» платформасындағы мәлімдемесінде Израиль Сыртқы істер министрі Гидеон Саармен телефон арқылы сөйлескенін хабарлап, «Мен Израиль қорғаныс күштерінің көмек тарату нүктелерінде адамдарды өлтіруді тоқтатуы керек екенін түсіндірдім»,- деді.

«Егер Израиль өз міндеттемелерін орындамаса, барлық мүмкіндіктер қарастырылады», - деп қосты Каллас.

Газа өз тарихындағы ең ауыр гуманитарлық апаттардың бірін бастан кешуде. Израиль күштері 2 наурызда барлық шекара өткелдерін жауып, азық-түлік, жанар-жағармай және медициналық көмек ағынын тоқтатқаннан кейін аштық тез тарала бастады.  

Әсіресе балалар мен созылмалы ауруы бар науқастар арасында дұрыс тамақтанбау салдарынан  ауру ушығуда.

Израильдің Газаға жасаған шабуылдарында 59 мыңға жуық палестиналық қаза тапты. Олардың басым көпшілігі әйелдер мен балалар.

Израиль шабуылдарын жалғастырып, Газа секторының көп бөлігін қирандыға айналдырды және бүкіл халықты көшірді.

Өткен қарашада Халықаралық қылмыстық сот Израиль премьер-министрі Беньямин Нетаньяху мен сол кездегі қорғаныс министрі Йоав Галлантты Газадағы соғыс қылмыстары мен адамзатқа қарсы қылмыстары үшін қамауға алуға ордер шығарды.

Израиль Палестинаға жүргізген аяусыз соғысы үшін Халықаралық сотта геноцид ісімен бетпе-бет келуде.