Ресей мен Украина жыл басында Стамбулда өткен келіссөз барысында қабылданған міндеттемелерді орындап, қаза тапқан әскерлердің мәйітін алмастырды.
Ресей президентінің көмекшісі Владимир Мединский жұма күні жасаған мәлімдемесінде, Мәскеу тарапы 1 000-нан астам украиналық әскердің мәйітін тапсырғанын, ал Киев ресейлік 26 әскердің мәйітін қайтарғанын айтты.
Украина Әскери тұтқындарды емдеу жөніндегі үйлестіру орталығы 1 003 украиналық әскердің мәйітін қабылдап алғанын растады және тасымалдауды ұйымдастырудағы көмегі үшін Халықаралық Қызыл Крест комитетіне алғыс білдірді.
Стамбулда гуманитарлық көмек мәселесі бойынша келісімге қол жеткізілді
Бұл алмасу ˗ соғыс басталғалы бері әскер мәйіттерін тапсырудағы ең маңызды кезеңдердің бірі. Соғыс төртінші жылға аяқ басқан тұста жүзеге асқан бұл шара тараптардың осы уақыт аралығындағы шығындарының артқанын айқын көрсетіп отыр.
Украина тарапының мәлімдемесінде Ресейге нақты қанша мәйіттің қайтарылғаны көрсетілмеген. Екі жақ та бұл операцияны Стамбулда қабылданған гуманитарлық жоспардың бір бөлігі ретінде бағалады.
Мәскеу мен Киев 16 мамыр, 2 маусым және 23 шілде күндері Стамбулда үш рет келіссөз өткізді. Кездесулер барысында бірнеше әскери тұтқын алмасу жүзеге асырылып, келісімге қол қойылды.
Екі ел арасында мәйіт алмасу соңғы рет өткен жылдың қараша айында жүзеге асқан болатын. Бұл жағдай қақтығыстар жалғасып жатқан кезеңде мұндай операциялардың қаншалықты маңызды екенін көрсетеді.
