Сәрсенбі күні президент Ердоған Анкараның қорғаныс саласында өңірлік және жаһандық тұрақтылықты қамтамасыз ету үшін маңызды қадам басқанын, бұл қадамның Түркия Республикасының негізін қалаушы Мұстафа Кемал Ататүрік ұсынған «Елде бейбітшілік ˗ әлемде бейбітшілік» сыртқы саясат қағидатымен үндес екенін айтты.
Ішкі бірлікті нығайтуға бағытталған күш-жігерге, әсіресе қорғаныс өнеркәсібіндегі маңызды жетістіктерге тоқталған Ердоған: «Өңірімізде және одан тыс аймақтарда тұрақтылықты қамтамасыз ету үшін табанды күрес жүргізіп келеміз», - деді.
Жаңа жыл түні ол ел астанасы Анкара қаласының Полатлы ауданындағы Артиллерия және зымыран мектебі қолбасшылығында қызмет атқарып жүрген әскери қызметкерлерге телефон арқылы үн қатты.
Ердоған «Аltay» танктері, «Fırtına» гаубицалары, «АTAK» тікұшақтары, қарулы және қарусыз ұшқышсыз әуе аппараттары, алыс қашықтықтағы зымырандар, әуе қорғанысы жүйелері, соғыс кемелері, сүңгуір қайықтар және ұшқышсыз теңіз аппараттарын қоса алғанда, Түркияның артқан әскери қуаты отандық өндіріс мүмкіндіктерінің дамығанын көрсетінін атап өтті.
«Қорғаныстың барлық саласында үлкен серпіліс жасаудамыз», - деген Ердоған елдің өз ресурстарын пайдалана отырып, өзін-өзі қамтамасыз ететін әскери инфрақұрылым қалыптастырғанын айтты.
Ол елеулі қиындықтар мен кедергілерге қарамастан, Түркияның соңғы жетістіктерін тұрақты, әрі ұзақ мерзімді табысқа айналдыру үшін тарихи мүмкіндікке ие болғанын жеткізді.
Президент Режеп Тайып Ердоған үкіметінің елді одан әрі нығайту және жаңа, қуатты, әрі ұлы Түркияны өскелең ұрпаққа аманат ету жолындағы табандылығын тағы да қайталады.
