Түркияның Еуропалық одақ (ЕО) пен НАТО-ға мүше елге жасаған алғашқы әскери кеме экспорты саналатын Теңіздегі жабдықтау және логистикалық қолдау кемелері жобасы аясында Португалия Әскери-теңіз күштері үшін салынатын екінші кеме – “N.R.P. D. DINIS” кемесінің болат кесу рәсімі Стамбулда өтті.
“STM Defence Technologies Engineering and Trade Inc.” Португалия Әскери-теңіз күштері үшін жүзеге асырып жатқан Теңіздегі қамтамасыз ету және логистикалық қолдау кемелері жобасында маңызды кезеңге жетті. Жобаның екінші кемесі N”.R.P. D. Dinis (A5212)” үшін Стамбулда болат кесу рәсімі ұйымдастырылып, өндіріс ресми түрде басталды.
Бірінші кеменің құрылысы 2025 жылдың қараша айында болат кесу рәсімімен басталып, 2026 жылдың қаңтар айында килі қаланған еді. Алғашқы кемедегі жұмыстар жалғасып жатқан кезде екінші кеменің өндірісі де қолға алынды.
STM бас директорының орынбасары Бүлент Сойдал НАТО стандарттарына сай әзірленген теңіз платформалары саласындағы тәжірибені Португалияға жеткізіп жатқанын атап өтті. Оның айтуынша, екі кемені де 2027 жылы суға түсіріп, 2028 жылы Португалия Әскери-теңіз күштеріне тапсыру жоспарланып отыр.
Стамбулдадағы “ADA” кеме жасау зауытында салынып жатқан кемелер логистикалық қолдау, теңізде жанармай мен жүк тасымалдау міндеттерімен қатар амфибиялық операциялар мен бірлескен күштерді орналастыру іс-шараларында да пайдаланылатын болады. Платформалар 20-ға дейін жеңіл тактикалық броньды көлікті тасымалдай алады, сондай-ақ гуманитарлық көмек, іздестіру-құтқару және медициналық қолдау операцияларына қатыса алады.
Ұзындығы 137 метр, су ығыстырғыштығы 11 мың тонна болатын кемелердің ең жоғары жылдамдығы 18 тораптан асады және теңізде 30 күн бойы үздіксіз қызмет атқара алады.
Кемелер жақын қашықтықтағы әуе шабуылына қарсы қорғаныс жүйелер, қашықтан басқарылатын қару-жарақтар және заманауи сенсорлармен жабдықталады. Сонымен қатар платформаларда тікұшақтар мен ұшқышсыз ұшу аппараттарына арналған ұшу палубасы мен ангар қарастырылған.
Әр кеме 100 адамдық негізгі экипаж және қосымша 100 адамды орналастыру мүмкіндігіне ие болады.
