АҚШ вице-президенті Джей Ди Вэнстің Беньямин Нетаньяхуға Газадағы атысты тоқтату жөніндегі келісімге мүмкіндік беру туралы өтініш жасағаны хабарланды.

Израильдің «Channel 12» телеарнасы АҚШ пен Израиль шенеуніктеріне сілтеме жасап, Вэнстің Нетаньяхумен кездесуде «Келісімге бір мүмкіндік беріңіз және бізге де өз ісімізді реттеу үшін уақыт беріңіз» дегенін жеткізді.

Ақпаратқа қарағанда, Нетаньяху Вэнске келісімге мүмкіндік беруге дайын екенін айтып, «Мен де келісімнің нәтижелі болғанын қалаймын», – деп мәлімдеген.

Кездесуге қатысқан америкалық шенеуніктің айтуынша, Нетаньяху атысты тоқтату режимін жалғастыру және келісімнің келесі кезеңдерін жүзеге асыру қажеттігі туралы Вэнстің үндеуіне ашық екенін айтқан.

Тағы бір дереккөздің хабарлауынша, АҚШ әкімшілігі Газаға орналастырылуы жоспарланған халықаралық күшке араб елдерінен экономикалық, әскери және дипломатиялық қолдау табуға тырысуда. Сонымен қатар Газа аймағын қайта қалпына келтіру үшін бейбітшілік кеңесін құру көзделіп отыр.

Ресми сапармен Израильде жүрген Джей Ди Вэнс сәрсенбі күні Батыс Иерусалимде Нетаньяхумен кездескен болатын.