Бірқатар Еуропа елі үкіметке қарсы, әрі үкіметті қолдайтын шерулердің тоқтамауы және АҚШ-тың Иранға соққы беруі мүмкін деген алаңдаушылықтың күшеюі салдарынан қауіпсіздік жағдайы нашарлағанын айтып, азаматтарын Ираннан кетуге шақырды.
Сәрсенбі күні Испания Сыртқы істер министрлігі азаматтарына елден кетуді ұсынды. Министрлік бүкіл ел бойынша ахуал тұрақсыз екенін атап өтіп, жаңартылған сапарға қатысты ескертуде. «Иранда жүрген Испания азаматтарына бар мүмкіндіктерді пайдаланып, елден шығу ұсынылады. Ел көлемінде жағдай тұрақсыз. Әртүрлі дереккөздерде кейбір шерушілердің қаза тапқаны және тұтқындаулар болғаны хабарланды», - делінген.
Италия да қауіпсіздікке байланысты азаматтарын Ираннан кетуге шақырған үндеуін қайталады. Италия Сыртқы істер министрлігі қазіргі таңда Иранда шамамен 600 Италия азаматы барын, олардың басым бөлігі Тегеранда екенін мәлімдеді.
Министрлік аймақта 900-ден астам Италия Қарулы күштері қызметкері бар екенін айтып, көрші елдерде қызмет атқарып жүрген қызметкерлерді қорғау үшін шаралар қабылданғанын жеткізді.
Польша да осыған ұқсас ескерту жариялап, азаматтарын Ираннан дереу кетуге шақырды, әрі бұл елге бармауға кеңес берді.
Германия да негізсіз ұсталу қаупі барын ескертіп, Иранда жүргендерді елден кетуге шақырды және бұл елге бармауға кеңес берді.
Аракчи үкіметтің бақылауды өз қолында ұстап отырғанын мәлімдеді
АҚШ президенті Дональд Трамп Иран үкіметке қарсы шерушілер мен олардың жетекшілерін өлім жазасына кескен жағдайда Иранға қарсы әскери операция жасалуы мүмкін екенін ескертті. Ал сәрсенбі күні бірнеше айыптау мен қоқан-лоққылардан кейін «Бізге Иранда өлім-жітім азайғаны айтылды», - деді.
Трамп АҚШ-тың қандай жауап қайтаратыны жөнінде нақты мәлімет бермеді. Оның бұл мәлімдемесі әрекетке көшуді кейінге қалдыра ма, жоқ па, ол жағы анық емес.
Иранда желтоқсан айының соңынан бері ұлттық валютаның күрт құнсыздануы мен экономикалық жағдайдың нашарлауына байланысты наразылық өршіп тұр. Шерулер Тегерандағы Үлкен базарда басталып, кейін көптеген қалаға тарады.
Иран билігі оқиғаларды сыртқы күштердің араласуымен байланыстырып, шерушілерді «террорлық әрекетке барды деп» айыптады.
Сәрсенбі күні Иран Сыртқы істер министрі Аббас Аракчи АҚШ-тың «Fox News» арнасындағы «Special Report» бағдарламасына сұхбат беріп, «Үш күнге созылған операциялардан кейін қазір тыныштық орнады. Бақылау толықтай бізде», - деді.
