Бұл туралы Кувейттің Ақпарат министрлігі әлеуметтік желідегі ресми парақшасында хабарлады.
Хабарламада техникалық мамандар мен тиісті органдар жүргізген зақымды анықтау жұмысы аяқталып, операциялардың қауіпсіздігін қамтамасыз ету үшін қажетті шаралар қабылданған соң рейстердің T4 терминалы арқылы қайта басталғаны айтылды.
Мәлімдемеде жолаушылар мен қызметкерлердің қауіпсіздігі басымдық болып қала беретіні және әуежай жұмысының үздіксіздігін ең жоғары қауіпсіздік стандарттарына сай қамтамасыз ету үшін барлық мүдделі тараптармен үйлестірілген жұмыстар жалғасатыны атап өтілді.
Кувейт ұлттық әуе компаниясы да рейстердің уақытша тоқтатылуына байланысты кейінге шегерілген ұшулардың кестесі қайта жасалып, жақын арада жарияланатынын білдірді.
Сондай-ақ бүгінгі рейстер бойынша броньдарын тоқтатқысы немесе өзгерткісі келетін жолаушылардан ешқандай қосымша ақы алынбайтыны хабарланды.
Бұған дейін Кувейт армиясы Иран жасаған камикадзе-дрон шабуылы салдарынан Кувейт халықаралық әуежайының жолаушы терминалына зақым келгенін және көптеген адамның жараланғанын мәлімдеген болатын.
Кувейттің Азаматтық авиация жөніндегі бас басқармасы да Ираннан жасалған шабуылдан кейін әуежайдағы рейстердің уақытша тоқтатылғанын хабарлады.
Өз кезегінде Иран Ислам революциясы сақшылар корпусы АҚШ-тың Иранға қарасты Кешм аралына жасаған шабуылына жауап ретінде Кувейттегі америкалық күштер орналасқан әскери базаларға зымыранмен соққы бергенін айтқан болатын.
