Түркия Республикасының Президенті Режеп Тайып Ердоған сейсенбі күні Анкарадағы Президенттік кешенде халықаралық турнирлерде күміс жүлде алған ерлер және әйелдер ұлттық құрамаларын қабылдады.

«12 алып адам» деп танылған Түркия Ерлер ұлттық баскетбол құрамасы жексенбі күні Ригада өткен “EuroBasket 2025” финалында Германияға қарсы тартысты ойында екінші орын алды. Команда 24 жылдан кейін алғаш рет Еуропа финалына шығып, тарихындағы екінші күміс медальға қол жеткізді.

Ердоған түрік әлеуметтік желісі “Nsosyal”-да жариялаған жазбасында: «Ерекше жетістігімен 24 жылдық үзілістен кейін халқымызға баскетболдағы финал қуанышын сыйлаған спортшыларымызды тағы да құттықтаймын... Жеңіс табалдырығында тұрып, кубокты ала алмағанымыз, әрине, аздап қынжылтады. Бірақ бір шындық бар – біз баскетболда керемет серпін алдық», – деп атап өтті.

Президент 2027 жылы Катарда өтетін Баскетболдан Әлем чемпионатында Түркияның ең мықты командалардың бірі болатынына сенімін білдірді.

Ердоған 2025 жылғы “FIVB” әйелдер әлем чемпионатында үздік шабуылшы-пасшы болып танылған Мелисса Варгасты да құттықтады.
Әйелдер волейбол құрамасы, яғни «Тордың Сұлтандары», осы айдың басында Бангкокта өткен “FIVB”  Әлем чемпионатында күміс жүлде жеңіп алып, тарихи жетістікке қол жеткізді. Президент Ердоған әлеуметтік желідегі жазбасында бұл табысты жоғары бағалап, «2025 жылғы Әлем чемпионатындағы жетістіктері үшін әрбір ұлттық спортшымызды құттықтаймын», – деді.

2002 жылы небәрі ширек миллион спортшымен шағын бастама жасаған Түркия бүгінде миллиондаған қатысушысы бар елге айналып, медаль санын арттырып келеді.

Жиырма жылдық инвестициялардың нәтижесінде жаңа чемпиондар тәрбиеленіп, елдің спортқа деген көзқарасы түбегейлі өзгергені байқалады.