Түркия президенті аппараты жанындағы Коммуникация басқармасының төрағасы Бурханеттин Дуран жексенбі күні Сирияда қол жеткізілген «Атысты тоқтату және толық интеграция келісімін» президент Режеп Тайып Ердоған ұзақ уақыттан бері назар аударып келе жатқан «террордан тазартылған аймақ» құру мақсаты жолындағы маңызды қадам ретінде бағалады.
Дуран Түркияның “Nsosyal” әлеуметтік желі платформасында жариялаған мәлімдемесінде: «Шарттардың орындалуы мұқият бақыланатын болады», – деп, болған оқиғалардың кездейсоқ емес екенін, бұл президент Ердоғанның жылдар бойы айтып келе жатқан қағидалары мен ескертулеріне сай екенін жеткізді.
Сирияда түбегейлі тұрақтылыққа қол жеткізу барлық этникалық және діни топтардың құқықтарын тең азаматтық негізінде қамтамасыз етуге байланысты екенін айтқан Дуран сөзін былай жалғастырды: «Аумақтық тұтастығын сақтаған және террорлық ұйымдардан тазартылған Сирия – өңірлік бейбітшіліктің кілті. Сирия үкіметінің осы бағытта жасаған қадамдары мен көрсеткен күш-жігері маңызды».
Дуран террорлық ұйымдарға қарсы жүргізілген операциялар Түркияның шекарасы бойында қауіпсіз аймақ құруға көмектескенін, ал дипломатиялық күш-жігер Сирияның болашағын айқындайтын үдерістерді қолдап отырғанын айтты.
Анкараның көрші елдің қауіпсіздігін өз қауіпсіздігінен бөлек қарастырмайтынын, бейбітшілікті қағида, ал тұрақтылықты мақсат ретінде қабылдайтынын мәлімдеді.
