Сирия президенті Ахмед Шара мен Халықаралық валюта қорының директоры Кристалина Георгиева Сирияның экономикалық дамуын қолдау мақсатында ынтымақтастық мүмкіндіктерін талқылады. Шара мен Георгиева жексенбі күні Вашингтон қаласындағы Халықаралық валюта қорының штаб-пәтерінде кездесті. Кездесуге Сирияның Сыртқы істер министрі Асад Шейбани де қатысты.
«SANA» агенттігінің хабарлауынша, тараптар «Сирия мен Халықаралық валюта қоры арасындағы ынтымақтастықтың экономикалық өсімді арттыру және реформаларды ілгерілетуге бағытталған ықтимал жолдарды талқылады.
Шара сенбі түні Бразилияда өткен «COP30» климат саммитіне қатысқаннан кейін Вашингтонға барған болатын. Ақ Үй өкілі Кэролайн Левитт АҚШ президенті Дональд Трамптың дүйсенбі күні Шарамен кездесетінін мәлімдеп, президенттің Сирияға салынған санкцияларды алып тастау шешімін тарихи деп атады.
Трамп пен Шара екіжақты және өңірлік мәселелермен қатар ең бастысы АҚШ-тың Сирияға қарсы санкцияларды алып тастау шешімін талқылауы мүмкін.
АҚШ Мемлекеттік департаменті өткен апта Сирияға санкция енгізген «Цезарь заңының» Конгресс тарапынан күшін жоюын қолдайтынын мәлімдеген болатын.
Шараның АҚШ-қа сапары ˗ 1946 жылы Сирия тәуелсіздік алғаннан бергі ел басшысының Америка Құрама Штаттарына жасаған алғашқы ресми сапары болуымен ерекшеленеді.
