Сауд Арабиясының Қорғаныс министрі ханзада Халид бин Салман демалыс күндері Иран мен АҚШ арасында өтетін Иранның ядролық бағдарламасы жөніндегі келіссөздер қарсаңында ресми тұлғалармен байланыс жасау үшін Тегеранға келді.
Қорғаныс министрі бейсенбі күні Сауд Арабиясының патшасы Салман бин Абдулазиздің жолдауын Иранның рухани көшбасшысы Әли Хаманейге жеткізді. Иранның мемлекеттік ақпарат құралдары жолдаудың мазмұны туралы мәлімет бермеді.
Ханзада Халид “X” аккаунтында жариялаған хабарламасында: «Екіжақты қарым-қатынасымыз және ортақ мүдде салаларымызды талқыладық» деді.
Әли Хаманей де кездесуді өзінің “X” аккаунтында растады, бірақ хаттың мазмұны туралы ақпарат бермеді.
Ханзада Халид Иран президенті Месуд Пезешкиянмен де кездесті. Кездесуде Сауд Арабиясы мен Иран арасындағы қатынастар қаралып, бұл қатынастарды дамыту жолдары талқыланды.
Ханзада Халид сонымен қатар: «Аймақтық және халықаралық ахуалды және осыған байланысты атқарылып жатқан жұмыстарды да талқыладық», — деді.
Римдегі Иран-АҚШ келіссөздері
Иран мен АҚШ Тегеранның даулы уран байыту бағдарламасына қатысты келіссөздердің екінші кезеңін осы демалыс күндері Римде өткізбекші.
Иранның мемлекеттік ақпарат құралдарына сәйкес, Иранның рухани көшбасшысы Әли Хаманей кездесуде: «Иран Ислам Республикасы мен Сауд Арабиясы арасындағы қарым-қатынастар екі ел үшін де пайдалы деп сенеміз», — деді.
Хаманей Тегеранның Эр-Риядпен қарым-қатынастарды дамыту жолындағы кедергілерді жоюға дайын екенін атап өтті.
Иран мен Сауд Арабиясы көпжылдық дұшпандықтан кейін Парсы шығанағындағы тұрақтылық пен қауіпсіздікке қатер төндірген шиеленісті тоқтату мақсатында 2023 жылы Қытайдың арағайындығымен қатынастарды қайта бастау туралы келіскен еді.
Сауд Арабиясы Иран мен АҚШ арасындағы ядролық келіссөздерді құптап, аймақтық және халықаралық дауларды шешуге бағытталған әрекеттерді қолдайтынын сенбі күні елдің ресми ақпарат агенттігі жариялаған мәлімдемеде білдірді.
Иранның мемлекеттік ақпарат құралдарына сәйкес, Иран Бас штаб бастығы Мұхаммед Бакири Тегеранда Сауд Арабиясының министрімен кездесуінен кейін «Пекин келісімінен бері Сауд Арабиясы мен Иран қарулы күштерінің арасындағы қарым-қатынастар дамып келеді», — деді.
Бакири аймақтық қауіпсіздік «ортақ стратегиялық мүдде» екенін баса айтып, Тегеранның саясаты көрші елдермен қатынастарды нығайтуға негізделгенін білдірді.
“IRNA” агенттігінің хабарлауынша, Бакири: «Осы себепті екі елдің қарулы күштері арасындағы қатынастардың кеңеюі мен нығаюы, кең ауқымды аймақтық ынтымақтастық үшін берік негіз құруы мүмкін», — деді.
2016 жылдан бергі қатынастар
Бейсенбі күнгі сапар екі ел арасындағы дипломатиялық қатынастардың қайта жандануынан бері жоғары дәрежелі саудтық қорғаныс өкілінің Тегеранға жасаған екінші сапары болды.
2024 жылдың қарашасында Сауд Арабиясы Қарулы күштері Бас штабының бастығы генерал-лейтенант Файяд бин Хамед әл-Рувайли екіжақты әскери келіссөздер үшін Тегеранға барған болатын.
Екі аймақтық держава арасындағы дипломатиялық қарым-қатынастар 2023 жылдың наурызында Пекинде Қытай арағайындығымен өткен келіссөздерден кейін қайта орнатылды. Бұл даму 2016 жылы Сауд Арабиясы шиіт діни жетекшісі Нимр әл-Нимрді өлім жазасына кескеннен кейін Ирандағы саудиялық дипломатиялық миссияларға наразылар шабуыл жасағаннан басталған жеті жылдық дипломатиялық үзілісті тоқтатты.
