АҚШ президенті Дональд Трамп Солтүстік Кореяның ядролық қаруды сынақтан өткізетін жалғыз ел емес екенін, Ресей мен Қытайдың да мұндай сынақтар жүргізіп жатқанын айтты. Трамп бұл мәлімдемесін «CBS News» телеарнасының «60 Minutes» бағдарламасына берген сұхбаты барысында жасады.
Бағдарлама жүргізушісі Нора О’Доннелл Солтүстік Корея ядролық қаруды сынайтын жалғыз мемлекет екенін айтқан сәтте Трамп сөзін бөліп, «Ресей сынақ жасап жатыр, Қытай сынақ жасап жатыр, бірақ ешкім бұл туралы айтпайды», - деді.
Трамп бұл мәлімдемені АҚШ әскеріне 30 жылдан астам уақыттан кейін ядролық қару сынағын қайта бастау жөнінде нұсқау бергеннен үш күн өткен соң жасады.
«Басқа елдер сынақ жүргізуде. Біз ғана сынақ жасамаймыз. Сынақ жасамайтын жалғыз ел болғымыз келмейді»,- деген Трамп бұл елдердің қаруларды нақты қай жерде сынақтан өткізіп жатқанын білудің мүмкін еместігін атап өтті.
Алып ядролық күш
Трамп ядролық қаруды қолданғысы келмейтінін қайталады, бірақ сол қарулардың қалай жұмыс істейтінін білу үшін оларды сынақтан өткізу қажет екенін мәлімдеді. «Бұл қисынды емес пе? Ядролық қару жасайсыз да, кейін оны сынақтан өткізбейсіз. Оны қалай жасайсыз? Оның жұмыс істейтінін қалай білесіз?» - деді ол.
Трамп сондай-ақ АҚШ-тың орасан зор ядролық күшке ие екенін және бұл күштің басқа кез келген елден мықты екенін атап өтті. «Ресей екінші орында. Қытай үшінші орында, бірақ бес жыл ішінде теңеседі. Білесіздер, олар тез өндіруде. Ядролық қаруды азайту үшін бірдеңе жасауымыз керек... Бізде әлемді 150 мәрте жоя алатындай ядролық қару бар. Ресейде де өте көп ядролық қару бар, Қытайда да көп болады»,- деді ол.
