«Haaretz» газетінің ақпаратына сүйенсек, Бен-Гвир израильдік кәсіпкер Яаков Элхарардың қызының үйлену тойына қатысу және дипломатиялық кездесу өткізу мақсатында АҚШ елшілігіне виза алу үшін өтініш білдірген.
Хабарламада Бен-Гвирдің виза рәсімдеу процесі аясында АҚШ елшілігіне саусақ ізін тапсыруға шақырылғаннан кейін Америкаға сапарынан бас тартқаны атап өтілген.
Израильдік БАҚ өкілдері Бен-Гвирдің басқа министрлер секілді дипломатиялық виза алуға құқығы бар екенін, алайда АҚШ елшілігі «әдеттен тыс» процедура қолданып, оңшыл министрден саусақ ізін талап еткенін баса айтуда. Бен-Гвирдің кеңсесі де АҚШ-тың Израильдегі елшілігі виза үшін саусақ ізін сұратқанын растады.
Сапардың қаржыландырылуы да талқылауға түсті
«Haaretz» басылымының мәліметінше, Бен-Гвирдің АҚШ-қа сапарының шығындарын израильдік кәсіпкердің өтейтіні туралы ақпарат та дау тудырған.
Мақалада Израильдің Қоғамдық бақылаушысы (омбудсмен) төрағалығымен жиналған комитеттің бұл сапарды кәсіпкер Элхарардың қаржыландыруына қарсылық білдіргені айтылады. Осы наразылықтан кейін Бен-Гвир сапар шығындарын израильдік кәсіпкердің мойнына алуы туралы өтінішін кері қайтарып алған.
Израильде министрлердің жеке көздерден қаржыландырылатын шетелдік сапарларына мүдделер қақтығысын тудырмау, мемлекеттік лауазымды асыра пайдаланбау және әдеп ережелеріне қайшы келмеу шартымен ғана рұқсат беріледі.
