Еуропалық комиссия төрағасы Урсула фон дер Ляйен Қаратеңіздегі шиеленістің күшеюіне назар аударып, Түркия, Румыния және Болгария арасындағы теңіз қауіпсіздігі саласындағы ынтымақтастықтың артуын құптайтынын айтты.
Фон дер Ляйен бұл туралы Румыния астанасы Бухарестте ел президенті Никушор Данмен бірге өткізген баспасөз мәслихатында мәлімдеді.
Оның айтуынша, Еуропалық одаққа мүше елдер өз шекараларында туындайтын дағдарыстарға жедел әрекет ету мүмкіндіктерін күшейтуі қажет.
«Жақында Қаратеңізде болған қайғылы оқиғалар – соның айқын мысалы», – деді ол.
Фон дер Ляйен Румынияға іздеу-құтқару жұмыстарын жүргізу үшін қосымша 10 миллион еуро бөлінетінін хабарлады.
Сонымен қатар ол Қаратеңіздегі теңіз қауіпсіздігі орталығын іске қосу қажеттігін атап өтті. Бұл бастама алғаш рет 2025 жылдың ортасында ұсынылған болатын.
«Сол уақыттан бері қауіпсіздік жағдайы біз ойлағаннан әлдеқайда тез нашарлады.
Осыған байланысты Түркия, Румыния және Болгария арасындағы теңіз қауіпсіздігі саласындағы ынтымақтастықтың нығаюын құптаймын», – деді фон дер Ляйен.
Ол қорғаныс пен қауіпсіздік мәселелерінде шұғыл әрекет ету қажеттігін айтып, Қаратеңіздегі теңіз қауіпсіздігі орталығын құру жұмыстарын жеделдететіндерін мәлімдеді.
Сондай-ақ орталықты толық іске қосу үшін нақты мерзім белгіленіп, осы мақсатқа арнайы 50 миллион еуро бөлінетінін хабарлады.
Украинадағы бейбіт келіссөздерге қатысты фон дер Ляйен: «Украинада атысты тоқтату туралы келісімге қол жеткізілмейінше, Еуропаның қауіпсіздік жүйесіне қатысты маңызды келіссөздер жүргізу мүмкін емес. Мұндай келіссөздер НАТО-ға одақтас елдер мен Еуропалық одақ мүшелерінің қатысуымен тиісті алаңда өтуі тиіс», – деді.
