Тракья Балқан түріктері мәдениет және ынтымақтастық қауымдастығының төрағасы Джеват Гүнеш 25 қазанда Болгарияда өтетін президент пен вице-президент сайлауына байланысты Түркияда тұратын қос азаматтығы бар тұрғындарды дауыс беруге шақырды.
Джеват Гүнеш журналистерге берген мәлімдемесінде Түркияда тұратын қос азаматтығы бар азаматтардың сайлауға белсенді қатысатынына үміт білдірді.
Болгарияда президент сайлауы сегізінші рет өткізілетінін еске салған Гүнеш сайлаудың екінші турға өту ықтималдығы жоғары екенін атап өтті. Оның айтуынша, екінші тур 1 қарашада өтуі мүмкін.
Гүнеш Түркияда тұратын Болгария азаматтары үшін елдің 18 провинциясында 78 сайлау учаскесі ашылатынын хабарлады.
«Сайлау учаскелері ашылатын 18 провинцияның ішінде Стамбул, Бурса, Измир және Текирдағ ерекше мәнге ие. Едирне қаласындағы Болгарияның Бас консулдығында да бір сайлау учаскесі жұмыс істейді. Дауыс беру таңғы сағат 07:00-де басталып, кешкі 20:00-де аяқталады. Егер сайлаушылар көп жиналса, дауыс беру уақыты 21:00-ге дейін ұзартылуы мүмкін», – деді ол.
«Азаматтарды демократиялық құқықтарын пайдалануға шақырамыз»
Гүнеш қос азаматтығы бар тұрғындардың Болгарияның жеке куәлігі немесе төлқұжаты арқылы дауыс бере алатынын мәлімдеді.
Ол Болгариядағы сайлаудың Түркияда тұратын қос азаматтығы бар тұрғындар үшін маңызды екенін ескертіп, былай деді:
«Біз қауымдастық ретінде отандастарымызды сайлауға белсенді қатысып, өздерінің демократиялық құқықтарын пайдалануға шақырамыз. Сайлауға қатысу және дауыс беру – әрбір азаматтың заңды құқығы. Біздің қауымдастық Болгариядағы саяси партиялар мен ұйымдардың Түркияда тұратын Болгария азаматтары да елдің басқа тұрғындарымен тең құқыққа ие екенін түсінгенін қалайды».
