Запорожье АЭС-інің әлеуметтік желідегі ресми парақшасында жарияланған мәлімдемеде Украина станцияның көлік бөліміне кемінде 14 дронмен шабуыл жасағаны айтылды.
Мәлімдемеге сәйкес, шабуылдардың бірі көлік ғимаратындағы гараж бөлігінде өрт шығуына себеп болған. Сондай-ақ гараж бен техникалық қызмет көрсету аймағындағы ғимараттар да зақымданған.
Онда жалғасып жатқан шабуыл қаупі мен тексеру жұмыстарына қойылған шектеулерге байланысты келтірілген шығынның нақты көлемін әзірге толық анықтау мүмкін болмай отырғаны атап өтілді.
Шабуыл салдарынан қаза тапқандар мен жараланғандардың жоқ екені хабарланды. Сонымен қатар станция қызметкерлері нысанның қауіпсіз әрі тұрақты жұмысын қамтамасыз ету үшін қажетті шараларды қабылдап жатқаны айтылды.
Запорожье атом электр станциясы Еуропадағы ең ірі атом электр станциясы саналады. Ресей әскері Украинадағы соғыс басталғаннан кейін 2022 жылдың наурыз айында станцияны бақылауына алған болатын.
