Президент әкімшілігінің қолдауымен, Мәдениет және туризм министрлігі мен Жастар және спорт министрлігінің ынтымақтастығында Стамбул ашық теңіз яхта жарысы клубы ұйымдастырған жарысқа 14 елден 500 спортшы қатысып, Чанаккале бағытына жолға шықты.

Долмабахчеде Мұстафа Кемал Ататүрік пен оның қаруластарын еске алу мақсатында бір минуттық үнсіздікпен басталған және 3 сағаттан астам уақытқа созылған жарыста спортшылар жел мен күрделі жолға қарсы стратегиялық айқас жүргізді. Стамбул халқы желкендердің 23 сәуір мерекесімен ұштасқан салтанатты көрінісіне куә болды.

«Ұлттық егемендік кубогы» үшін бақ сынасқан командалар бұғаз кезеңін аяқтап, Чанаккале бағытына қарай желкен жайды.

Стамбул ашық теңіз яхта жарысы клубының төрағасы Экрем Йемлихаоғлу әр кезеңнің өзіндік рухы мен тарихы бар екенін айтып, былай деді: «Президенттік 7-ші Халықаралық яхта жарысы — бұл жай ғана спорттық шара емес, сонымен қатар Түркияның теңіздегі қуатын әлемге паш ететін мәртебелі көрме іспетті. Мақсатымыз — осынау ерекше күндердің рухани мәнін теңіздегі күресімізбен ұштастыру, туымызды халықаралық суларда мақтанышпен желбірету және бұл спортты келер ұрпаққа кәсіби деңгейде аманаттау».

Тарихқа тағзым жарысы

Чанаккале жеңісінің 111 жылдығына орай ұйымдастырылған «Тарихқа тағзым жарысында» спортшылар Чанаккале желіне қарсы жүзеді. 104 теңіз милі бойы жалғасатын қиын күресте Чанаккалеге бірінші жеткен команда «Жағалау күзеті кубогын» иеленеді.

Спортшылар 25 сәуірде Чанаккале бұғазында (Дарданелл) күресті жалғастырады. Үш күнге созылатын тартысты жарыстың қорытындысы бойынша жеңімпаз команда «Жеңіс кубогын» алады.

Жарыстың екінші кезеңі — 19 мамырда, үшінші кезеңі — 30 тамызда, ал финалдық «Республика кубогы» кезеңі 29 қазанда Стамбул бұғазында өтеді.