Президент Режеп Тайып Ердоған Түркияның Оңтүстік Кореямен жоғары технологиялар саласындағы ынтымақтастыққа ерекше мән беретінін атап өтті.
Оңтүстік Корея президенті Ли Чжэ Мённың шақыруымен Сеулге барған Ердоған делегациялар арасындағы келіссөздерден кейін өткен бірлескен баспасөз мәслихатында сөз сөйледі.
Ердоған Түркия мен Оңтүстік Корея арасындағы тарихи достықтың негізі 76 жыл бұрын Корей соғысы кезінде түрік сарбаздарының Кореяның тәуелсіздігі жолындағы жанқиярлық ерлігімен қаланғанын еске салды. Ол екі ел арасындағы кездесулер мен келіссөздер ынтымақтастықты жаңа деңгейге көтеріп, болашаққа бағытталған байланыстарды нығайта түсетінін атап өтті.
Түркия басшысы Оңтүстік Корея президентімен кездесуде экономикалық және сауда қатынастарына басымдық берілгенін, сондай-ақ атом энергетикасы мен тау-кен өнеркәсібіндегі ынтымақтастықтың маңызды орын алғанын жеткізді.
«Біз аккумулятор өндірісі, жасанды интеллект және жартылай өткізгіштерді қоса алғанда, жоғары технологиялардың көптеген саласында Кореямен ынтымақтастықты дамытуға ерекше мән береміз. Өздеріңіз білетіндей, қорғаныс өнеркәсібі – стратегиялық серіктестігіміз нақты нәтижелер берген негізгі салалардың бірі. Президентпен кездесу барысында өздігінен жүретін «Fırtına» артиллериялық қондырғылар мен «Аltay» танкісі сияқты бірлескен жобалардың санын арттыру қажеттігін атап өттік», – деді Ердоған.
Президент Ердоған халықаралық мәселелер бойынша екі елдің ұстанымдары көбіне сәйкес келетінін атап өтті.
«Халықаралық мәселелерге қатысты көзқарастарымыз негізінен бір-біріне сай келеді. Біз Корей түбегінде тұрақты бейбітшілік пен тұрақтылық орнатуға бағытталған диалогқа негізделген тәсілді қолдаймыз», – деді ол.
Сонымен қатар Түркия президенті Біріккен Ұлттар Ұйымы, МИКТА және «G20» сияқты көпжақты халықаралық алаңдардағы ынтымақтастықты бүкіл адамзаттың игілігі үшін одан әрі дамытуға ниетті екенін жеткізді.
