Түркияның Армениямен қарым-қатынасты қалыпқа келтіру жөніндегі арнайы өкілі Сердар Кылыч Ахалкалаки–Карс теміржол желісінің ашылуы көршілес екі ел арасындағы сауда үшін жаңа қадам екенін айтты.

Кылыч жексенбі күні «X» әлеуметтік желісіндегі парақшасында Армения премьер-министрі Никол Пашинянның теміржол желісінің Арменияның сыртқы саудасына ашылғаны туралы мәлімдемесіне сілтеме жасады. Ол бұл өзгерісті Түркия мен Армения арасындағы қарым-қатынасты қалыпқа келтірудегі жаңа қадам ретінде бағалады.

Кылыч: «Түркия, Армения, Әзербайжан және Грузия арасындағы төртжақты ынтымақтастықты дамытатын, сондай-ақ өңірлік бейбітшілік пен тұрақтылыққа елеулі үлес қосатын бұл қадам барлық ел үшін пайдалы болуын тілеймін», – деді.

Ал Армения премьер-министрі бұл қадамды ел экономикасы үшін маңызды жетістік деп атап, Түркия мен Грузиядағы серіктестеріне алғыс білдірді.

Пашинянның айтуынша, Армения енді Грузия мен Әзербайжан арқылы Ресейдің, ал Ресей мен Қазақстан арқылы Қытайдың теміржол қатынасына қол жеткізеді.

Сондай-ақ ол Түркия мен Грузия арқылы өтетін теміржол бағыты Арменияның Еуропалық Одақпен байланысын күшейтетінін, ал Түркия, Әзербайжан және Иранмен теміржол қатынасын орнату жоспарланып отырғанын айтты.