Президент Режеп Тайып Ердоған мен Ливан президенті Жозеф Аун екіжақты қарым-қатынастарды және өңірлік мәселелерді талқылады. Түркия Президент аппараты жанындағы Коммуникация басқармасының хабарлауынша, сейсенбі күні өткен телефон әңгімесінде Ердоған Түркияның әрдайым Ливанның тұрақтылығы мен егемендігін қолдайтынын атап өтіп, екі елдің сауда және инвестиция салаларында зор әлеуетке ие екенін жеткізген.
Президент Анкараның Ливанның қауіпсіздігін қолдайтын халықаралық жүйеге қолдау көрсетуге дайын екенін айтып, Ливаннан Кипр түріктерінің құқықтары мен мүдделерін ескеретін ұстаным күтетінін мәлімдеді.
Өңірлік даму мәселелеріне де тоқталған Ердоған Сириядағы ауқымды өзгерістердің өңір тұрақтылығына үлес қосуы үшін Түркияның қолдауын жалғастыратынын айтты.
Израильдің агрессивті ұстанымы
Мәлімдемеде сондай-ақ Режеп Тайып Ердоғанның Израильдің Ливанға қатысты агрессивті ұстанымын қабылдамайтыны атап өтілді.
Израиль мен Ливан Газада соғыс жүріп жатқан тұста бір жылдан астам уақытқа созылған шекарааралық шабуылдардан кейін 2024 жылдың қарашасында атысты тоқтату туралы келісімге келген болатын. Бұл шабуыл салдарынан 4 мыңнан астам адам қаза тауып, 17 мың адам жарақат алды.
Атысты тоқтату келісіміне сәйкес, Израиль күштері қаңтар айында Ливанның оңтүстігінен толықтай шығуы керек болатын, алайда әскердің шығарылуы ішінара ғана жүзеге асырылды. Қазіргі уақытта Израильдің бес шекара бекетінде әлі де әскер бар.
