Түркия Республикасының президенті Режеп Тайып Ердоған АҚШ президенті Дональд Трамппен телефон әңгімесінде Николас Мадуро ұсталғаннан кейін Венесуэланың тұрақсыздыққа ұрынбауы керектігін айтты.
Дүйсенбі күнгі министрлер кабинетінің отырысынан кейін Ердоған егемендік құқықтарын бұзу және халықаралық құқықты аяқасты ету жаһандық деңгейде күрделі мәселелерге әкеп соқтыруы мүмкін қауіпті қадамдар екенін білдірді.
«Түркия халықаралық құқықты бұзатын ешқандай әрекетті құптамайды», — деген Ердоған Анкараның Түркия үшін де, дос Венесуэла халқы үшін де ең игілікті іс жасауға тырысып жатқанын жеткізді.
Президент Ердоған Түркия мен түрік халқының өркендеу, тыныштық пен даму жолындағы күресінде дос Венесуэла халқының қасында болуды жалғастыратынын айтып, «Мадуро мырза мен Венесуэла халқы біздің ұлтымыздың досы екенін талай рет дәлелдеді», — деп атап өтті. Сонымен қатар Ердоған ережелерге негізделген халықаралық тәртіпті сақтаудың маңыздылығын баса айтты.
Президент Түркияның әлемнің кез келген нүктесінде әділдікті, заңдылықты және халықаралық құқықты қорғайтын елдердің алдыңғы қатарында екенін мәлімдеді.
АҚШ сенбі күні таңертең ерте Мадуро мен әйелін әскери базада орналасқан үйлерінен ұстап алып, Нью-Йоркте соттау үшін АҚШ-тың әскери кемесіне отырғызды. АҚШ Әділет министрлігінің айыптау қорытындысына сәйкес, Мадуро мен әйелі «есірткі терроризмі» әрекеттеріне қатысты деп айыпталуда.
Мадуро дүйсенбі күні Манхэттендегі сотта алғаш рет судья алдына шығып, АҚШ таққан барлық айыптарды жоққа шығарды.
