Иран Сыртқы істер министрлігінің ресми өкілі Исмаил Бекаи: «АҚШ-пен келіссөз жүргізіп жатқан жоқпыз. Оманмен жүргізіліп жатқан келіссөздер Ормуз бұғазы арқылы кемелердің қауіпсіз өтуіне бағытталған», – деді.
Бекаи Тегеранда өткен дәстүрлі апталық баспасөз мәслихатында күн тәртібіндегі мәселелерге қатысты мәлімдеме жасады.
Оның айтуынша, Оманмен жүргізіліп жатқан келіссөздердің мақсаты – Ормуз бұғазы арқылы кемелердің қауіпсіз қатынауын қамтамасыз ету үшін жаңа уақытша бағытты айқындау.
Ол қазіргі уақытта Пәкістанның делдал ел ретінде әрекет етіп жатқанын, ал Катардың делдалдық күш-жігерді қолдап отырғанын айтты. Сондай-ақ Қытайдың өңірдегі қақтығыстар мен қауіпсіздікке төнген қатердің күшеюіне алаңдаушылық білдіріп, жағдайдың одан әрі ушығуына жол бермеуге күш салып жатқанын жеткізді.
Бекаи Иранға қатысты «басқыншылық ұстанымды» тек күш пен тежеу арқылы тоқтатуға болатынын айтып, АҚШ-тың тек Иранның ғана емес, өңірдегі барлық елдің қауіпсіздігіне қауіп төндіріп отырғанын мәлімдеді.
Сонымен қатар ол АҚШ-тың өңірдегі әскери базаларын пайдалануы тұрақсыздықты күшейтетінін айтты. АҚШ президенті Дональд Трамптың Иранға қатысты қатаң мәлімдемелеріне пікір білдірген Бекаи: «Біз ирандық болып қала береміз. Өзіміздің адамгершілік қағидаларымыз бар. Басқалардың дөрекі сөздерін үлгі етеді деп ойламаймын», – деді.
Бекаи сондай-ақ Украинаның Каспий теңізінде Иранға тиесілі кемеге жасаған шабуылы туралы да пікір білдірді. Оның айтуынша, Украина билігі бұл оқиғаның қасақана жасалмағанын мәлімдегенімен, Украина президенті Владимир Зеленский бұған қайшы мәлімдемелер жасаған.
«Украинаның бұл оқиғаның қасақана болмағаны жөніндегі мәлімдемесін растайтын нақты қадам баса ма, соны күтеміз. Осындай оқиғалардың қайталанбауы үшін қажетті шараларды қабылдаймыз», – деді Бекаи.
