Қазақстанда конституциялық өзгерістерден кейін енгізілген бір палаталы парламент жүйесі аясында құрылған Құрылтайға депутат сайлауы 23 тамызда өтеді.
Қазақстан президенті Қасым-Жомарт Тоқаев Құрылтай депутаттарын сайлау туралы жарлыққа қол қойды.
Құжатта Қазақстан Республикасы Конституциясының 46-бабының 3-тармақшасы және 95-бабының 1-тармағына сәйкес Құрылтай депутаттары сайлауын 2026 жылдың 23 тамызында өткізу туралы шешім қабылданғаны көрсетілген.
Жарлық бүгіннен бастап күшіне енді. Қазақстанның Орталық сайлау комиссиясы сайлауға дайындық пен оны өткізу жұмыстарын ұйымдастырады. Үкіметке, сондай-ақ бас қала, облыстар мен республикалық маңызы бар қалалардың жергілікті атқарушы органдарына сайлау өткізу үшін әкімшілік, техникалық және қаржылық шараларды қабылдау тапсырылды. Қазақстанда 1995 жылдан бері жұмыс істеп келген Мәжіліс пен Сенаттан құралған екі палаталы парламент жүйесі 15 наурыздағы конституциялық референдумнан кейін жұмысын тоқтатты.
Референдум қорытындысы бойынша 145 депутаттан тұратын Құрылтай атты жаңа бір палаталы заң шығарушы орган құру мақұлданған болатын.
