Түркия президенті Режеп Тайып Ердоған Біріккен Ұлттар Ұйымының Бас хатшысы Антониу Гутерришпен кездесті.
Кездесуде өңірлік және жаһандық мәселелер талқыланды. Президент Ердоған өкілеттік мерзімі аяқталуға жақын қалған Гутерришпен жаһандық бейбітшілік пен қауіпсіздікке қатысты көптеген мәселеде тығыз жұмыс істегендерін айтты.
Ердоған Израильдің Газада бейбітшілік орнатуға ниетті емес екені тағы да байқалғанын, Батыс Шериядағы заңсыз қоныстанушылардың зорлық-зомбылығы мен Иерусалимдегі қасиетті орындарға жасалған шабуылдар жағдайды одан әрі ушықтырып отырғанын айтты. Сондай-ақ екі мемлекет қағидатына негізделген шешімнің негізін сақтау қажеттігін атап өтті.
Президент Ердоған Иран мен Украина төңірегіндегі шиеленісті бәсеңдету қажет екенін, Түркияның дипломатиялық үдерісті жалғастыру үшін күш салып жатқанын айтты. Ол Ормуз бұғазына қатысты өңір елдерінің бастамасымен жүзеге асатын үдеріс пайдалы болуы мүмкін екенін де жеткізді.
Ердоған Қаратеңіздегі кеме қатынасының қауіпсіздігін қамтамасыз ету үшін тараптардан жауапты ұстаным күтетінін айтып, Қаратеңізде Түркияның сауда кемелерінің нысанаға алынуына алаңдайтынын атап өтті.
Президент Ердоған кездесуде Кипр түрік халқының егемендік теңдігі мен халықаралық деңгейдегі тең мәртебесін мойындамайтын ешбір ұсыныстың нәтиже бермейтінін мәлімдеді.
БҰҰ-ның Нью-Йорктегі штаб-пәтерінде өткен кездесуде президент Ердоған БҰҰ Бас Ассамблеясының 81-сессиясына орай әзірленген арнайы кітапқа қол қойды.
Президент Ердоған Катар әмірі Тамим бен Хамад Әл Танимен де кездесті.
Кездесуде Түркия мен Катар арасындағы екіжақты қатынастар, сондай-ақ өңірлік және жаһандық мәселелер қаралды. Президент Ердоған Түркия мен Катардың инвестиция, сауда, энергетика және қорғаныс өнеркәсібі бастаған барлық саладағы ынтымақтастығын одан әрі дамыту үшін жұмысты жалғастыратынын айтты.
Өңірдегі энергия жеткізіліміне кері әсер етіп отырған жағдайлардың баршаға қиындық туғызатынын айтқан Ердоған энергетика және көлік дәліздері саласындағы ынтымақтастықты нығайтудың маңызды екенін атап өтті.
Президент Израильдің Газада бейбітшілікке бағытталған қадамдар басуға әлі де ниет танытпай отырғанына назар аударып, Израильдің өңірдегі әрекеттерін тежеу үшін халықаралық қауымдастықтың күшті қысым жасауы маңызды екенін айтты.
Президент Режеп Тайып Ердоған сондай-ақ Сенегал президенті Бассиру Диомай Файе, Польша президенті Кароль Навроцкий, Ұлыбритания премьер-министрі Энди Бернхэм, Жапония премьер-министрі Такаити Санаэ және Бангладеш премьер-министрі Тарик Рахманмен жеке-жеке кездесті. Бұл кездесулерде де екіжақты қатынастармен қатар халықаралық мәселелер талқыланды.
