Түркия президенті Режеп Тайып Ердоған Ресей президенті Владимир Путинге Анкараның Ресей-Украина соғысының әділ әрі түбегейлі аяқталуына үлес қосу үшін күш-жігерін жалғастыратынын айтты.
Түркия Президент аппараты жанындағы Коммуникация басқармасының мәліметінше, Ердоған мен Путин дүйсенбі күні телефон әңгімесі барысында Ресей-Украина соғысын, сондай-ақ аймақтық және жаһандық мәселелерді талқылаған.
Ердоған Анкараның тараптар арасында тікелей байланыс орнатуды жеңілдететін дипломатиялық бастамаларға қолдау көрсетуге дайын екенін атап өтіп, мұның тұрақты бейбітшілікке негіз болатынын жеткізді.
Жексенбі күні «G20» көшбасшыларының саммиті аясында журналистерге сөйлеген сөзінде Ердоған Түркияның Таяу Шығыстан Африка мен Украинаға дейінгі қақтығыс аймақтарында халықаралық бейбітшілікке үлес қоса беретінін айтып, жаһандық дағдарыстарды шешуде Анкараның маңызды актер екеніне назар аударды.
Саммитте Ердоған Қаратеңіз астық бастамасын қайта жандандыру мәселесін талқылау үшін Ресей басшысымен телефон арқылы сөйлесетінін мәлімдеп, «Астық дәлізіне қатысты біздің күш-жігеріміз шын мәнінде бейбітшілікке жол ашуға бағытталған еді. Бұл үдерісті қайта бастай алсақ, өте пайдалы болады деп ойлаймын», - деді.
Ердоған Түркияның қақтығысты тоқтату үшін қолдан келгеннің бәрін жасайтынын, барлық мүмкіндікті қарастыратынын айтып, «Тағы да қаншама адам қаза тапты. Бұл өлімдерді тоқтату үшін не істей аламыз, мұны өзімен (Путинмен) талқылаймын. Ал осы келісімнен кейін нәтижені еуропалықтармен, Трамп мырзамен және басқа да достарымызбен талқылаймыз деп ойлаймын», - деді.
