Иран АҚШ президенті Дональд Трамптың Ормуз бұғазын қайта ашуға қатысты мәлімдемесіне: «Біздің шарттарымыз қабылданғанға дейін бұғаз қайта ашылмайды», — деп жауап берді.
Парсы шығанағы су жолдарын басқару мекемесі бұл мәселеге қатысты “X” әлеуметтік желісіндегі парақшасында мәлімдеме жасады.
Мәлімдемеде: «АҚШ шенеуніктерінің Ормуз бұғазындағы Иран блокадасының алынғаны туралы бірінен соң бірі жасаған мәлімдемелері мен әлеуметтік желілердегі жазбалары шындықты өзгертпейді. Ормуз бұғазы әлі де жабық және Иранның шарттары қабылданғанға дейін қайта ашылмайды», - делінген.
АҚШ президенті Дональд Трамп бұған дейін өз елінің Ормуз бұғазына «толық бақылау» орнатқанын айтқан еді.
Трамп әлеуметтік желіде жариялаған жазбасында: «АҚШ Ормуз бұғазын толық бақылауда ұстап отыр. Алдағы уақытта да бақылауды өз қолымызда ұстаймыз деп ойлаймын», — деген еді.
