Израиль министрлер кабинеті жеке сектор арқылы Газаға тауарлардың бақылаумен кіруіне мүмкіндік беретін жоспарды бекітті.

Газаға қарсы блокаданы жүзеге асырып отырған Израильдің әскери агенттігі «COGAT» сейсенбі күні жасаған мәлімдемесінде: «Бұл жоспар Газаға жеткізілетін гуманитарлық көмектің көлемін арттыруды және БҰҰ мен халықаралық ұйымдардың көмек тарату шараларына тәуелділікті азайтуды мақсат етеді»,- деді.

Мәлімдемеде жаңа жоспар аясында шектеулі саудагерлерге рұқсат берілгені атап өтілді. Бұл қадам Газа секторындағы 2,4 миллион халықты ашаршылыққа жеткізген Израильдің блокадасы кезінде жасалды.

Палестина Денсаулық сақтау министрлігінің мәліметінше, 2023 жылдың қазан айынан бері кемінде 180 адам аштық пен дұрыс тамақтанбау салдарынан көз жұмған. Олардың 93-і бала.  

Газа секторындағы Палестина үкіметінің медиа кеңсесі дүйсенбі күні жасаған мәлімдемесінде, Израиль 27 шілдеден бері небәрі 674 гуманитарлық жүк көлігіне кіруге рұқсат бергенін хабарлады. Бұл аймақтың күнделікті ең төменгі қажеттілігі болған 600 жүк көлігінің тек 14 пайызына сәйкес келеді.

Нәтижесіз

Палестина Денсаулық сақтау министрлігінің мәліметінше, 27 мамырдан бері гуманитарлық көмек алуға келген кемінде 1 516 адам Израиль шабуылынан қаза тауып, 10 067 адам жарақат алған.
Израиль ұсынған гуманитарлық көмек жоспары тиімсіз деп танылып, аштықтан зардап шегіп жатқан бейбіт тұрғындар үшін «өлім тұзағы» болғандықтан үлкен сынға ұшырады.

Израильдің Газаға жасаған шабуылдарында 61 мың палестиналық қаза тапты. Олардың басым көпшілігі әйелдер мен балалар.

Израиль шабуылдарын жалғастырып, Газа секторының көп бөлігін қирандыға айналдырды және бүкіл халықты көшірді.

Өткен қарашада Халықаралық қылмыстық сот Израиль премьер-министрі Беньямин Нетаньяху мен сол кездегі қорғаныс министрі Йоав Галлантты Газадағы соғыс қылмыстары мен адамзатқа қарсы қылмыстары үшін қамауға алуға ордер шығарды.

Израиль Палестинаға жүргізген аяусыз соғысы үшін Халықаралық сотта геноцид ісімен бетпе-бет келуде.