Индонезия Әскери-теңіз күштерінің баспасөз қызметі сейсенбі күні Батыс Ява өңірінде болған көшкін салдарынан 23 сарбаздың қаза тапқанын растады.
Бір күн бұрын басталған нөсерлі жауын-шашынның әсерінен болған көшкін сенбі күні таңертең Бандунг-Барат ауданындағы Пасир-Лангу ауылын басып қалды.
Ауыл Индонезияның астанасы Джакартадан шамамен 100 шақырым оңтүстік-шығыста провинцияның таулы аймағында орналасқан.
Әскери-теңіз күштерінің өкілі, бірінші адмирал Тунггулдың айтуынша, 23 теңіз жаяу әскері сенбі күні Индонезия мен Папуа–Жаңа Гвинея шекарасындағы патрульдерге арналған оқу-жаттығу кезінде көшкін астында қалған.
Индонезияның Апаттарды басқару агенттігінің өкілі Абдул Мухари көшкіннен зардап шеккен ауылдың 685 тұрғыны жергілікті әкімшілік ғимараттарына эвакуацияланғанын хабарлады.
Хабар-ошарсыз кеткендерді іздеу үшін кемінде 800 құтқарушы, әскери және полиция қызметкерлері, сондай-ақ тоғыз экскаватор жұмылдырылды.
Көшкін Ява аралында жауын-шашын мол түсетін кезеңде болды.
Өткен аптада су тасқындары Индонезияның көптеген өңірін, соның ішінде Джакарта мен Батыс Ява және Орталық Явадағы бірқатар қаланы шарпыған еді.
