АҚШ Мемлекеттік департаменті бейсенбі күні Украинаға “Hawk” зымыран жүйесін қолдауға арналған жабдықтарды ықтимал сатуды мақұлдағанын хабарлады. Келісімнің құны — 108,1 миллион доллар.
Конгреске жолданған хабарламаға сәйкес, Украина “FrankenSAM HAWK” зымыран жүйелері үшін тік орнатылатын мачталы тіркемелерді, ірі модификацияларды және техникалық қызмет көрсету қолдауын, қосалқы бөлшектерді, шығын материалдарын, аксессуарларды, жөндеу және қайтару қолдауын, сондай-ақ АҚШ үкіметі мен мердігерлердің инженерлік, техникалық және логистикалық қызметтерін сұраған.
Мемлекеттік департамент бұл келісім Украинаның қауіпсіздігін нығайту арқылы АҚШ-тың сыртқы саясаты мен ұлттық қауіпсіздік мақсаттарын қолдайтынын, сондай-ақ Украинаны Еуропадағы саяси және экономикалық тұрақтылыққа үлес қосатын серіктес ретінде сипаттады.
Министрлік бұл пакет Украинаның өзін-өзі қорғау және өңірлік қауіпсіздік міндеттері үшін біріктірілген әуе қорғаныс қабілетін күшейтіп, қазіргі және болашақ қауіп-қатерлерге қарсы тұру мүмкіндігін арттыратынын атап өтті.
Ведомство Украина бұл жабдықтар мен қызметтерді қарулы күштеріне енгізуде ешқандай қиындық көрмейтінін және сатылым өңірдегі негізгі әскери тепе-теңдікті өзгертпейтінін де айтты. Мемлекеттік департамент сондай-ақ ұсынылған сатылым АҚШ-тың қорғаныс дайындығына теріс әсер етпейтінін мәлімдеді.
Колорадо штатындағы Энглвуд қаласында орналасқан “Sierra Nevada Corporation” — бұл бағдарламаның негізгі мердігері.
