Біріккен Ұлттар Ұйымының басып алынған Палестина аумақтары жөніндегі арнайы баяндамашысы Франческа Албанезе Газадағы Израиль геноцидінің қатыгездігін айыптап, оның бірнеше мемлекеттің ынтымақтастығымен жүзеге асқанын мәлімдеді.
Албанезе дүйсенбі күні «X» платформасындағы жазбасында: «Көптеген мемлекеттің қатысуымен жасалған Израиль геноцидін Доха форумында айыптадым»,- деді.
Франческа Албанезе халықаралық қауымдастықты жедел әрекет етуге шақырып, «Көпжақтылықты сақтап қалғысы келетін мемлекеттер тез арада жаңа одақтар құрып, шын мәнінде БІРІККЕН ҰЛТТАР ретінде әрекет етіп, зұлымдық жасайтындарды тығырыққа тіреуі тиіс»,- деді.
Албанезе қазан айында жариялаған «Газа геноциді: ұжымдық қылмыс» атты баяндамасында «үшінші мемлекеттердің» Израильге тікелей қолдау, материалдық көмек, дипломатиялық қорғау, ал кейбір жағдайларда тіпті белсенді қатысқанын атап өткен.
Геноцид және атысты тоқтату келісімінің бұзылуы
Израиль 2023 жылдың қазан айынан бері 70 мыңнан астам палестиналықты өлтірді. Олардың көпшілігі ˗ әйелдер мен балалар. Аймақтың басым бөлігі қирап, тұрғындар босқынға айналды.
2023 жылы Оңтүстік Африка Халықаралық сотқа жолдаған, Израильді геноцид жасау айыбымен жауапқа тартатын іс жалғасуда.
Екі ай бұрын атысты тоқтату туралы келісімге қол жеткізілгенімен, Израиль бұл келісімді бұзуды жалғастыруда.
