Ресей Қорғаныс министрлігі Украинадағы энергетика, әскери өнеркәсіп нысандары мен порттарға соққы жасалғанын хабарлады.

Министрлік мәлімдемесінде Ресей армиясының Украинадағы іс-қимылдары туралы ақпарат берілді.

Түнде Украинаның энергетика және әскери өнеркәсіп нысандарына, сондай-ақ порттарына жоғары дәлдіктегі қару мен дрондар арқылы соққы жасалғаны айтылып, нысанаға алынған орындар аталды.

Мәлімдемеде Киевте қанатты зымыран шығаратын «Fire Point» зауыты, дрон өндіретін «Aerobabovna» зауыты және теміржол инфрақұрылымына тиесілі «Дарница» локомотив депосы соққыға ұшырағаны айтылды. Сондай-ақ Киев облысында теңіз дрондарын шығаратын цех пен мұнай терминалы нысанаға алынған.

Одесса қаласы мен облысындағы нысандарға да соққы жасалғаны хабарланды. Атап айтқанда Одесса портындағы Батыс елдері жеткізген қару-жарақ пен әскери техника қоймалары, жанармай резервуарлары, Черноморск портындағы әскери қоймалар, порттардың жұмысын қамтамасыз ететін электр станциясы мен үш қосалқы станция, дрон құрастыратын цех, сондай-ақ Орловка шекара бақылау және паром өткелі нысанаға алынған.