Екі рет әлем чемпионы болған және Олимпиада алтын медалін жеңіп алған Джордж Форман қайтыс болды. Оның отбасы жариялаған хабарламада, Форманның 76 жасында өмірден өткені хабарланды.
Форманның ресми «Instagram» парақшасында жарияланған хабарламада “Өте қайғылы хабармен, сүйікті Джордж Эдвард Форманның 2025 жылдың 21 наурызында жақындарының жанында өмірден озғанын хабарлаймыз” деп жазылған.
Отбасы “Көрсетілген сүйіспеншілік пен дұғалар үшін алғысымызды білдіреміз. Жеке өмірімізге құрмет көрсетілсе екен деп сұраймыз” деп, жұртшылықтан түсіністік танытуды өтінді.
«Instagram» арқылы жарияланған хабарламада Форман сенімге негізделген және мақсатқа бағытталған өмір сүрген уағызшы, күйеу, әке және ата ретінде сипатталды.
Отбасы Форманның бокстағы жетістіктері мен мұрасын сақтауға тырысқанын атап өтті.
Форман 1968 жылы Олимпиадада алтын медаль жеңіп, 1973 және 1994 жылдары екі рет ауыр салмақтағы әлем чемпионы атанды.
Бокс карьерасын аяқтағаннан кейін уағызшылық және кәсіпкерлік салаларындағы жұмыстары арқылы да танылды.
