Денсаулық сақтау министрлігінің мәліметіне сәйкес, Израиль атысты тоқтату режимін тағы да бұзып, төрт адамды өлтірген. Олардың бірі – әйел. Сондай-ақ 51 адамды жаралаған. Араларында үш бала бар.
Ливан ұлттық ақпарат агенттігінің дерегінше, Израильдің әскери ұшақтары Тир аймағындағы Маждаль Зун елді мекенін нысанаға алған. Сонымен қатар агенттік Израиль армиясының Ханинде үйлерді қиратқанын және Шихинде тағы бір ірі жарылыс жасағанын хабарлады. Әуе шабуылдары Хадата, Браашит және Харис елді мекендерін де қамтыған.
Үлкен күнә
Ливан президенті Жозеф Аун: «Мақсатым – 1948 жылғы Араб-Израиль соғысынан кейін 1949 жылы қол қойылған бітім келісіміне ұқсас түрде Израильмен соғыс жағдайын тоқтату. Құқықтарымыз тапталатын келісімге ешқашан келіспеймін», – деп мәлімдеді. Бұған дейін Хезболла жетекшісі Ливанды қатаң сынға алып, Израильмен тікелей келіссөздерді «үлкен күнә» деп атаған болатын.
Хезболла басшысы Наим Кассем өз мәлімдемесінде «Біз Израильмен тікелей келіссөздерді мүлде қаламаймыз, ал биліктегілердің әрекеттері Ливанға да, өздеріне де пайда әкелмейді», – деді. Сондай-ақ ол билік өкілдерін Ливанды тұрақсыздық тұңғиығына итермелейтін үлкен күнәларынан бас тартуға шақырды.
Бітім шартын бұзу әрекеттері
Израиль 2 наурыздан бері Ливанда 2 520-дан астам адамды өлтіріп, 7 800-ден астамын жаралаған.
17 сәуірде Ливан мен Израиль арасында 10 күндік атысты тоқтату келісім жарияланғанымен, Тель-Авив бұл келісімді бірнеше рет бұзды.
Бейсенбі күні Дональд Трамп тараптар арасында Вашингтонда өткен келіссөздердің екінші кезеңінен кейін Ливан мен Израильдің атысты тоқтату мерзімін үш аптаға ұзартуға келіскенін мәлімдеді.
Хезболла Израильдің атысты тоқтату режимін қайта-қайта бұзғанын айтып, Ливанның оңтүстігі мен Израильдің солтүстігінде орналасқан израильдік әскери күштерге қарсы бірқатар қарымта шабуыл жасады.
