АҚШ Қорғаныс қауіпсіздігі жөніндегі ынтымақтастық агенттігі (DSCA) сәрсенбі күні жасаған мәлімдемесінде АҚШ Мемлекеттік департаменті Үндістанға 93 миллион доллар көлеміндегі “Javelin” танкіге қарсы зымыран жүйелерін және “Excalibur” атты басқарылатын артиллериялық оқ-дәрілерін сатуға рұқсат бергенін хабарлады.
Екі ел арасындағы қатынастар тамыз айында нашарлаған еді. Шиеленіс АҚШ президенті Дональд Трамптың Үндістанның Ресейден мұнай сатып алуына жауап ретінде үнді тауарларына салынатын баж салығын 50 пайызға көтеруінен басталған.
“DSCA” мәлімдемесіне сәйкес «Бұл келісім АҚШ-тың сыртқы саясат және ұлттық қауіпсіздік мақсаттарын қолдай отырып, АҚШ–Үндістан стратегиялық серіктестігін нығайтуға және Үнді–Тынық мұхиты мен Оңтүстік Азия аймақтарында саяси тұрақтылық, бейбітшілік және экономикалық өркендеу үшін маңызды күш болып отырған Үндістанның қауіпсіздігін арттыруға көмектеседі».
