Сирия мен Қытай қауіпсіздік және терроризмге қарсы бағыттарда ынтымақтастықты тереңдетуге келісті.

Дүйсенбі күні Сирия Сыртқы істер министрі Асад Хасан Шайбани Пекинде Қытайдың Сыртқы істер министрі Ван Имен өткізген келіссөздерден кейін жарияланған ортақ мәлімдемеде екі тараптың терроризмге қарсы күрес пен қауіпсіздік салаларында үйлестіру мен ынтымақтастықты күшейту жөнінде келісімге келгені айтылды.

Мәлімдемеге сәйкес, екі министр «конструктивті екіжақты кездесу» өткізіп, Сирия–Қытай қатынастары және ортақ халықаралық мәселелер жөнінде пікір алмасты.

Тараптар Сирия мен Қытай арасындағы «тарихи достықтың маңызын» атап өтіп, қарым-қатынасты өзара құрмет және ішкі істерге араласпау қағидаттарына сүйене отырып қорғап, дамытуға міндеттеме алды.

Сонымен қатар екі тарап экономика мен даму, Сирияны қалпына келтіру, сириялықтардың өмір сүру жағдайларын жақсарту сияқты салаларда ынтымақтастықты нығайтуға ниетті екендерін білдірді.

«Толық құрмет»

Ван И Сирияның саяси процесіне, сондай-ақ терроризм мен есірткіге қарсы күресіне қолдау көрсететінін айтты және Израиль басып алған Голан жоталарын «халықаралық деңгейде оккупацияланған Сирия жері» деп атады.

Мәлімдемеге сай, Қытай Сирияның егемендігіне, тәуелсіздігіне, аумақтық тұтастығына және ұлттық бірлігіне «толық құрмет» білдіретінін және Сирия үкіметін «Сирия халқының жалғыз заңды өкілі» деп танитынын қайта растады.

Ал Сирияның мемлекеттік “SANA” агенттігі Cыртқы істер министрлігіндегі дереккөзге сілтеме жасап, Дамасктың ұйғыр жауынгерлерін Қытайға тапсыруды жоспарлап отырғаны жөніндегі хабарламаларды жоққа шығарды.

Бұған дейін Шайбани Пекинге сапар жасаған кезде бірқатар медиа құралдары Сирияның ұйғыр жауынгерлерін Қытайға беруді көздеп отырғаны туралы ақпарат таратқан еді.