АҚШ Денсаулық сақтау және әлеуметтік қызмет министрлігі хантавирус таралған круиз кемесінен елге қайтарылған 17 АҚШ азаматының бірінен вирус анықталғанын хабарлады.
Министрлік жексенбі күнгі мәлімдемесінде: «Бір жолаушыда жеңіл симптомдар байқалуда, ал тағы бір жолаушының тесті ‘Andes’ вирусына төмен деңгейде оң нәтиже көрсетті», - деп мәлімдеді.
Мәлімдемеде екі жолаушының ұшақтың биологиялық қорғаныс бөлімінде тасымалданғаны айтылды.
Кеме тоқтаған Испанияның Канар аралдарынан эвакуацияланған америкалық жолаушылар Небраска штатындағы арнайы орталыққа жеткізіледі. Ал жеңіл симптомдары бар кісі басқа мекемеге орналастырылады.
Келгеннен кейін бұл адамдар клиникалық тексеруден өтіп, жағдайларына қарай тиісті ем мен көмек берілетіні хабарланды.
“MV Hondius” кемесінен үш жолаушы қайтыс болып, көптеген адам әдетте кеміргіштер арасында таралатын осы сирек ауруды жұқтырған еді.
Бұған дейін “MV Hondius” круиз кемесінен эвакуацияланған француз жолаушысы еліне қайтып бара жатқан ұшақта хантавирус белгілерін көрсеткен болатын.
Испания билігі жұқтырған кеміргіштердің жағалауға жетуі мүмкін деген алаңдаушылықты жоққа шығарып, Анд тауларындағы кеміргіштің жағалауға дейін жүзіп жету ықтималдығы «нөлге тең» екенін білдірді.
