Ресми ақпарат құралдарының хабарлауынша, басып алынған Батыс Шерияда заңсыз израильдік қоныстанушылар мен Израиль армиясы ұйымдастырған шабуыл салдарынан екі палестиналық қаза тапты.
«WAFA» ақпарат агенттігінің дүйсенбі күні таратқан мәліметіне сәйкес, 19 жастағы Ахмед Рубхи әл-Атрашты Хебронның солтүстік кіреберісінде бір заңсыз қоныстанушы атып өлтірген.
Куәгерлердің айтуынша, Израиль әскері Қызыл Кресттің дәрігерлеріне әл-Атрашқа көмек көрсетуге жол бермеген, ал жараланған жігіт қансырап көз жұмған. Кейін отбасы мәйітін алып кеткен.
Сондай-ақ Палестина Денсаулық сақтау министрлігі 17 жастағы Жамиль Атыф Ханнанидің жексенбі күні кешке Наблус маңындағы Бейт-Фурик қалашығында Израиль армиясының рейді кезінде ауыр жарақат алып, ауруханада қайтыс болғанын хабарлады.
Палестина Қызыл Жарты ай ұйымының дерегінше, Ханнанидің кеудесіне оқ тиген. Рафидия мемлекеттік ауруханасына жеткізілгенімен, дәрігерлер оның өмірін құтқара алмаған.
Палестиналық дереккөздердің мәліметіне сәйкес, 2023 жылдың қазан айынан бері басып алынған Батыс Шерияда Израиль шабуылдары күшейіп, 1 063-тен астам палестиналық қаза тапқан. 10 300 адам жараланған.
Халықаралық сот биыл шілде айында тарихи шешім қабылдап, Израильдің Палестинаны оккупациялауын заңсыз деп таныды. Батыс Шерия мен Шығыс Иерусалимдегі барлық қоныстарды тез арада эвакуациялауға шақырды.
