Ердоған Түркияның қорғаныс өнеркәсібін нығайтуды жалғастыра отырып, өңірді қақтығыстар арқылы қайта қалыптастыру әрекеттеріне қарсы күрес жүргізіп жатқанын мәлімдеді.
Дүйсенбі күні Анкара қаласында өткен Үкімет отырысынан кейін сөз сөйлеген ол Газа, Ливан, Йемен және Суданда шекараларды қан мен көз жасы арқылы қайта айқындауға ұмтылыс байқалып отырғанын айтып, Түркия мұндай «ойындарға» қарсы күш салып жатқанын жеткізді.
«Өңірімізде шекараларды қан мен көз жасы арқылы қайта айқындау талпыныстары жүзеге асып жатқанын көріп отырмыз. Газадан Ливанға, Йеменнен Суданға дейінгі аймақта бір сценарийді көреміз. Түркия осы «ойындарды» бұзуға тырысуда және соңғы 23 жылда қол жеткізген жетістіктерімізді нығайту үшін еңбек етіп келеміз», – деді Ердоған.
Ол сондай-ақ Түркияның қорғаныс өнеркәсібінің дамығанын айтып, өңірлік және жаһандық деңгейде ауқымды өзгерістер жүріп жатқан кезеңде елдің ұзақ мерзімді мақсаттарына назар аударуды жалғастыратынын атап өтті.
«Билік пен одақ ретінде тарихи жауапкершілік арқалап отырғанымызды жақсы түсінеміз. Бізде ашуға, жанжалға және бос пікірталастарға уақыт жоқ», – деді Түркия президенті.
Сонымен қатар Ердоған «Византияның сарқыншақтары» деп атаған топтардың қарсылығына қарамастан, Стамбул қаласының түрік әрі мұсылман қала болып қала беретінін айтты.
«Біз бір боламыз, ірі боламыз, бауыр боламыз, бәріміз бірге Түркия үшін жолымызды жалғастырамыз», – деді ол.
