АҚШ президенті Дональд Трамп Үндістан Ресейден мұнай импорттауды тоқтатпаса, үнді тауарларына ауқымды кеден салығын енгізетінін айтып, сес көрсетті. Бұл жағдай екі ел арасындағы шиеленісті одан әрі күшейтті.
Трамптың айтуынша, Үндістан премьер-министрі Нарендра Моди Үндістанның Ресейден мұнай сатып алуды тоқтататынына жеке өзі сендірген. «Моди маған: «Мен Ресей мұнайымен айналыспаймын»,- деді. Егер олар мұны жалғастыратын болса, онда ауқымды салық төлейді», – деді Трамп.
Бұл мәлімдемелер АҚШ-тың энергетика саласында Ресеймен сауда байланысын үзбеген елдерге қысымын күшейткен тұста жасалды. Вашингтон мұндай сауданың жанама түрде Мәскеудің Украинадағы соғыс қимылдарын қаржыландырып отырғанын алға тартуда.
Үндістан АҚШ-тың жоғары тарифтік шараларына тап болып отыр. Трамп биыл тоқыма бұйымдарынан бастап фармацевтика өнімдеріне дейін түрлі тауарларға салынатын кеден салығын 50 пайызға дейін көтерген болатын. Ол Үндістан Ресей мұнайын импорттауды тоқтатпаса, бұл салықтардың жалғасатынын, тіпті одан әрі өсетінін айтты.
Трамп осы айдың басында Модидің өзіне Үндістанның Ресей мұнайынан бас тартатынын айтқанын мәлімдеді, алайда Үндістан бұл мәлімдемеге ешқандай түсініктеме берген жоқ.
Украинадағы соғыс басталғаннан бері Үндістан Ресейдің ең ірі мұнай сатып алушыларының бірі болып отыр.
