Газаға бет алған “Global Sumud” флотының гуманитарлық конвойында болған 223 халықаралық белсенді Израиль күштері тарапынан қамауға алынды. Алайда түрік капитаны Мұхаммед Күчүктигин басқарған “Mikeno” кемесі 20-дан астам заңсыз кедергіге қарамастан бөгеттерді бұзып өтіп, Палестина су айдынына жетті.
“Global Sumud” флоты бейсенбі күні “X” платформасы арқылы жасаған мәлімдемесінде сәрсенбі түнінен бері Израиль күштерінің 15 кемеге шабуыл жасағанын, сонымен қатар тағы сегіз кеменің шабуылға ұшыраған болуы мүмкін екенін немесе әлі де шабуыл астында тұрғанын хабарлады.
Флот шабуылға ұшыраған кемелердегі 223 белсендінің аты-жөндері мен азаматтықтарын “Instagram” арқылы жариялады. Сонымен қатар флоттың ресми трекері Израиль күштерінің 20 кемеге шабуыл жасағанын, ал 24 кеменің Газаға қарай сапарын жалғастырып жатқанын көрсетті.
Ғаламдық миссияға қатысушы түрік белсендісі Ердем Өзвереннің айтуынша, өзі де отырған кеме Газаға 30 теңіз милінен де жақын жерде орналасқан.
Газаға бет алған 50-ден астам кеме
Гуманитарлық және медициналық жүк тиелген кемелерден құралған флот тамыз айының соңында жолға шықты. Көп жылдан кейін алғаш рет 50-ден астам кеме 45-тен астам елден келген 500-ден астам азаматтық еріктімен бірге Газаға бет алды.
Израиль шамамен 2,4 миллион халқы бар Газаны 18 жылдан бері қоршауда ұстап келеді. Наурыз айында шекара өткелдерін жауып, азық-түлік пен дәрі-дәрмек жеткізуді тоқтатып, блокаданы одан әрі күшейтті. Бұл жағдай аймақты ашаршылыққа ұшыратты.
2023 жылғы қазаннан бері Израильдің әуе шабуылдарынан 66 мыңнан астам палестиналық қаза тапты, олардың басым бөлігі – әйелдер мен балалар.
Біріккен Ұлттар Ұйымы мен адам құқықтары ұйымдары аймақтың өмір сүруге жарамсыз болып бара жатқанын, ашаршылық пен аурулардың жылдам тарап жатқанын бірнеше рет ескертті.
