Рим, Византия, Селчук және Осман империясынан қалған ескерткіштерімен танымал, талай өркениеттің ізі сақталған Бурсаның Изник ауданы шетелдік туристік агенттіктердің тур бағдарламасына енгізілді. Мамыр айынан кейін өңірге шетелдік туристер көптеп келмек.
Анадолы агенттігінің мәліметінше, өткен жылы қаладағы қонақүйлерде 365 мың 78 шетелдік және 1 миллион 395 мың 975 жергілікті турист қонған.
Түркия туристік агенттіктер қауымдастығы, Оңтүстік Мармара өңірлік кеңесінің төрағасы Энгин Балта өткен жылы Бурсада туризм қарқынды дамып, турист санының артқанын жеткізді.
Балта өткен жылы Бурсаға Индонезия мен Малайзиядан қонақтардың көптеп келгенін атап өтіп, «Индонезия мен Малайзиядан бөлек, Таяу Шығыс елдерінен, әсіресе Кувейттен көптеген турист келді. Бурса олардың екінші үйіне айналды. Кейін Еуропадан да туристер келе бастады. Бұл елдерден келетін туристер саны күн сайын артып келеді. Бұл біз үшін керемет жаңалық. Биыл шетелдік туристер саны артады деп болжап отырмыз», – деді ол.
Төраға Рим папасы 14-ші Леоның өткен жылдың 28 қарашасында Изникке жасаған сапарынан кейін діни туризмнің маңызы айтарлықтай артқанын атап өтті.
Оның айтуынша, Папаның сапары әлемдік бұқаралық ақпарат құралдарында кеңінен жарияланып, Изниктің халықаралық деңгейде танылуына зор үлес қосқан. Сондықтан шетелдік туристер бұл өңірге келуге қызығушылық танытып отыр.
Балта шетелдік туристер үшін Изникте бірнеше туристік бағыт әзірленгенін айтып, «Изникке байланысты бірнеше жоба мен турпакеттерімізді дайындадық. Бұл бағдарламаларды шетелдік агенттіктерге жібердік. Олар туристерге осы турларды ұсынуда. Шетелдік туристер келгеннен кейін бұл турларды әріптестерімізбен бірлесіп ұйымдастыруды жоспарлап отырмыз. Германия, Англия, Нидерланд және Швейцария сияқты елдерден бұл бағыттарға сұраныс жоғары», – деді.
