Йемен армиясы соңғы 24 сағатта хоуситтердің бекіністер мен қосымша күштеріне қарсы 1272 операция жүргізіліп, 500-ге жуық хоуситтің залалсыздандырылғанын хабарлады.
Йемен армиясының ресми өкілі, полковник Мәжид Абдулла ән-Нәзили “X” әлеуметтік желісіндегі парақшасында операциялардың «Йемен таңы» әскери операциясы аясында жүргізілгенін мәлімдеді.
Нәзили соңғы 24 сағат ішінде хоуситтердің шоғырланған орындары, бекіністері, атыс нүктелері, көлік және жабдықтау құралдары нысанаға алынған 1272 операция жүргізілгенін айтты.
Операциялар нәтижесінде арасында майдандағы қолбасшылар да бар 500-ге жуық хоуситтің залалсыздандырылғанын атап өткен Нәзили хоуситтерге тиесілі 169 көлік құралы, әскери техника мен ауыр қарудың жойылғанын немесе пайдалануға жарамсыз күйге келтірілгенін жеткізді.
Нәзили үкімет күштерінің елдің солтүстігіндегі Әл-Жауф, орталық бөлігіндегі Мариб пен Әл-Байда, оңтүстігіндегі Лахж және оңтүстік-батысындағы Таиз провинцияларында барлық майдан шебінде операцияларын жалғастырып жатқанын мәлімдеді. Сондай-ақ әуе күштері мен артиллериялық бөлімшелердің қолдауы әскери жасақтардың алға жылжуына ықпал еткенін атап өтті.
Ал Әл-Жауф провинциясындағы үкімет күштері хоуситтердің бақылауындағы провинция орталығы Әл-Хазм қаласының алдыңғы қорғаныс шебін құрайтын стратегиялық маңызы бар Хувейшиян тауларын толық бақылауға алғандарын хабарлады.
Йемен Президенттік кеңесінің төрағасы Рашад әл-Улейми мемлекеттік мекемелерді хоуситтердің бақылауынан қайтарып алу және ел астанасы Сананы бақылауға алу мақсатында басталғанын жариялаған «Йемен таңы» операциясы 5 қазаннан бері жалғасып келеді.
