АҚШ президенті Дональд Трамп Иранға шектеулі соққы жасауды қарастырып отырғанын айтқанын кейін, Тегеран билігі дүйсенбі күні қандай да бір шабуыл, тіпті шектеулі болса да, басқыншылық әрекет ретінде бағаланатынын және оған жауап қайтарылатынын хабарлады.
Иран Сыртқы істер министрлігінің өкілі Исмаил Бекаи: «Менің ойымша «шектеулі шабуыл» деген нәрсе жоқ. Басқыншылық әрекет ˗ ол басқыншылық әрекет, болды. Кез келген мемлекет өзін-өзі қорғау құқығы аясында мұндай әрекетке қатаң жауап береді. Біз де дәл солай әрекет етеміз», - деді.
Таяу Шығыста АҚШ-тың ірі әскери күштерінің шоғырлануынан кейін, Вашингтонның Иранға қарсы әскери әрекет туралы қауіптері күшейді.
Иранның Сыртқы істер министрі Аббас Аракчи «CBS News» арнасына берген сұқбатында «Егер АҚШ бізге шабуыл жасаса, онда өзімізді қорғауға толық құқығымыз бар», - деді. Сонымен қатар ол дипломатиялық шешімге қол жеткізу мүмкіндігі жоғары екенін де атап өтті.
Иран президенті Масуд Пезешкиан да әлеуметтік желідегі жазбасында америкалық тараппен өткен алдыңғы келіссөздерде жігерлендіретін белгілердің болғанын хабарлады.
Женевада өткен соңғы келіссөздерден кейін Иран әскери операцияны болдырмайтын келісімге қол жеткізу үшін ұсыныс жобасын дайындағанын мәлімдеді.
Аракчи: «Меніңше, осы бейсенбі Женевада қайта кездескенде, сол мәселелерді талқылап, жақсы мәтін дайындап, тез арада келісімге қол жеткізе аламыз», - деді.
Соңғы апталарда АҚШ Таяу Шығысқа екі әуе тасымалдаушы кемесін, сондай-ақ жойғыш ұшақтар мен кемелер жіберіп, ықтимал әскери операция қаупін күшейту үшін аймақтағы әуе қорғанысын нығайтты.
