Түркия, Мысыр, Иордания, Индонезия, Пәкістан, Катар, Сауд Арабиясы және Біріккен Араб Әмірліктерінің сыртқы істер министрлері сейсенбі күні бірлескен мәлімдеме жариялады. Олар Израильдің басып алынған Батыс Шериядағы кең аумақты «мемлекеттік жер» деп жариялау туралы шешімін айыптады. Министрлер бұл қадамның халықаралық құқықты бұзатынын және бейбітшілік үміттеріне нұқсан келтіретін елеулі шиеленіс екенін білдірді.
Түркия Сыртқы істер министрлігі жариялаған ресми мәлімдемеге қарағанда, сегіз елдің сыртқы істер министрлері Израильдің басып алынған Батыс Шериядағы ауқымды жерлерде меншік құқығын тіркеу және қоныстандыру процедураларын мақұлдауын сынға алды. Мұндай тәжірибе 1967 жылдан бері алғаш рет қолданылып отыр.
Министрлер бұл қадамның заңсыз екенін және елді мекендердің кеңеюі мен жерді басып алуды тездететінін атап өтті.
Бірлескен мәлімдемеде: «Аталған заңсыз қадам қоныстандыру әрекеттерін жеделдетуді, жерді басып алуды, Израильдің іс жүзіндегі бақылауын нығайтуды және басып алынған Палестина территорияларында Израильдің заңсыз егемендігін орнатуды көздейтін қауіпті шиеленіс болып табылады және Палестина халқының заңды құқықтарына нұқсан келтіреді», — делінген.
Халықаралық құқыққа қайшы
Бірлескен мәлімдемеге қол қойған министрлер бұл әрекеттердің халықаралық құқықты, әсіресе Төртінші Женева конвенциясын, халықаралық гуманитарлық құқықты және Біріккен Ұлттар Үйымы Қауіпсіздік Кеңесінің тиісті қарарларын, атап айтқанда 2334 (2016) қарарын бұзушылық екенін растады.
Сондай-ақ мәлімдемеде Халықаралық Соттың консультативтік қорытындысына сілтеме жасалып, бұл шараның басып алынған Палестина жерлерінің құқықтық, тарихи және демографиялық мәртебесін өзгертуге бағытталған әрекеттердің заңсыздығы, басып алуды тоқтату міндеттемесі және күш қолдану арқылы жерді иемденуге тыйым салу туралы ұстанымдарымен қайшы келетіні айтылды.
Министрлер басып алынған Палестина территорияларының құқықтық, демографиялық және тарихи мәртебесін өзгертуге бағытталған кез келген біржақты әрекетті айыптайтындарын қайталап, халықаралық қауымдастықты заң бұзушылықтарды тоқтатуға және Палестина құқықтарын қорғау үшін «айқын әрі батыл қадам» жасауға шақырды.
