Баку мен Ереван сәрсенбі күні Біріккен Араб Әмірліктерінің Абу-Даби қаласында Ильхам Әлиев пен Никол Пашинян арасында өткен кездесулерден кейін екіжақты сауда және экономикалық ынтымақтастықты кеңейту мүмкіндіктерін зерделеуге келісті.
Абу-Дабиде өткен келіссөздерден соң Әзербайжан президент әкімшілігі таратқан мәлімдемеде тараптардың былтыр тамыз айында Вашингтонда Дональд Трамптың қатысуымен өткен саммит қорытындыларын іске асыруда қол жеткізілген ілгерілеуді құптағаны айтылды.
Мәлімдемеде Әзербайжан-Армения қатынастарын қалпына келтіру үдерісінде оң серпінді сақтаудың маңызы атап өтіліп, екі тараптың да бейбітшіліктің пайдасын іс жүзінде көріп отырғаны айтылды.
Мәлімдемеде «Мемлекеттер екіжақты сауданың басталуын және Әзербайжаннан Арменияға мұнай өнімдерінің экспортталуын, сондай-ақ үшінші елдерден Арменияға Әзербайжан аумағы арқылы астық пен басқа да тауарлардың транзитін құптады», - делінген.
Сондай-ақ тараптаhдың екіжақты сауда мен экономикалық ынтымақтастықты кеңейту мүмкіндіктерін қарастыруға келіскені, азаматтық қоғам өкілдерінің өзара сапарлары құпталғаны және сенім шараларын ұлғайту қажеттігі жөнінде ортақ пікірге келгені атап өтілді.
Әлиев пен Пашинян Халықаралық бейбітшілік пен өркендеу үшін Трамп бағыты (TRIPP) жобасын және өзге де байланыс жобаларын іске асыруды да талқылаған.
Мәлімдемеде екі көшбасшының бейбітшілік пен тұрақтылықты одан әрі нығайтуға ниетті екендерін растағаны және өзара қалпына келтіру үдерісін қолдау үшін байланыстарды жалғастыруға келіскені айтылды. Абу-Дабидегі кеңейтілген келіссөз қорытындылары жөніндегі ақпарат Армения премьер-министрінің кеңсесі тарапынан да жарияланды.
8 тамызда Ақ Үйде Пашинян, Әлиев және АҚШ президенті Дональд Трамп қатысқан үшжақты саммитте тараптар ондаған жылға созылған қақтығысты тоқтату, өзара әрекеттерді доғару, көлік жолдарын қайта ашу және қатынастарды қалпына келтіру жөнінде декларацияға қол қойған болатын. Құжатқа сәйкес, TRIPP жобасы Әзербайжанды Армения арқылы Нахчыван аймағымен байланыстырады.
Соңғы апталарда Әзербайжан Арменияға бірнеше рет отандық мұнай өнімдерін жөнелтті. Алғашқы жеткізілім желтоқсан айының соңында жүзеге асқан. Бұл ˗ Оңтүстік Кавказдағы екі көрші елдің ұзаққа созылған қақтығыстан кейін қарым-қатынасты жақсартуға бағытталған қадамдарының бірі.
