АҚШ президенті Дональд Трамп журналистерге сейсенбі күні Тегеранның ядролық бағдарламасына қатысты Женевада басталатын Иран мен АҚШ арасындағы келіссөздерге «жанама» түрде қатысатынын және Тегеранның келісім жасағысы келетініне сенетінін мәлімдеді. «Мен бұл келіссөздерге жанама түрде қатысамын. Бұл өте маңызды келіссөз болады», - деді ол.
АҚШ-тың Таяу Шығысқа екінші әуе кемесін орналастыруына байланысты келіссөздер алдында шиеленіс күшейіп отыр.
АҚШ шенеуніктері “Reuters” агенттігіне келіссөздер сәтсіз аяқталған жағдайда АҚШ армиясы ұзақ мерзімді әскери операция мүмкіндігіне дайындалып жатқанын айтты.
Келісімге қол жеткізу мүмкіндігі туралы сұраққа жауап берген Трамп Иранның қатаң саудаға барғанын, бірақ өткен жазда АҚШ Иранның ядролық нысандарына соққы берген кезде мұндай ұстанымның салдарын түсінгенін айтты.
Жанама ядролық дипломатия
Израильдің Иранға жасаған шабуылы мен одан кейінгі 12 күндік соғыстан соң келіссөздер тоқтатылғаннан шамамен сегіз ай өткенде 6 ақпанда Иран мен АҚШ Оманның арағайындығымен Маскатта жанама ядролық дипломатияны қайта бастады.
Соңғы келіссөз аяқталғаннан кейін екі тарап та оң бағасын берді. Бұл кездесулер Парсы шығанағы аймағында АҚШ-тың әскери күш жинауына байланысты шиеленіс күшейген жағдайда өтті.
Уран байыту мәселесі келіссөздердегі негізгі келіспеушілік болып қала береді. Иран ядролық қызметін шектеуге қарымжы ретінде Батыстың экономикалық санкцияларын алып тастауды талап етеді.
АҚШ болса Иранның уран байытуды толық тоқтатып, жоғары деңгейде байытылған уран қорын шетелге шығаруын қалайды.
