Салтанатты рәсімге Түрік Академиясының президенті Шаһин Мұстафаев, Түркі Мемлекеттері Ұйымы Ақсақалдар Кеңесінің төрағасы Бинали Йылдырым, Түркия Республикасы Сауда министрінің орынбасары Өзгүр Волкан Агар, Түрік мәдениетінің халықаралық ұйымы Түріксойдың Бас хатшысы Сұлтан Раев, Ататүрік Мәдениет, Тіл және Тарих Жоғары Қорының президенті Деря Өрс, Түркия ЮНЕСКО Ұлттық комиссиясының президенті Өзал Оғыз, Түрік Мәдениеті мен Мұрасы Қорының президенті Ақтоты Райымқұлова, ТүркПА Бас хатшысының орынбасары Сақы Садыков, ТМҰ Бас хатшысының орынбасары Мерей Мұқажан, сондай-ақ түркі мемлекеттерінің дипломатиялық миссия өкілдері мен ғылыми орта өкілдері қатысады.
Шара барысында Түркі Академиясының соңғы 15 жылда жарияланған негізгі ғылыми еңбектері мен монографияларының таныстырылымы өткізіліп, Академияның қызметі мен жетістіктерін бейнелейтін арнайы фотокөрме және бейнефильм көпшілік назарына ұсынылады.
Сонымен қатар Түркі Академиясының Түркі мемлекеттеріндегі тұрақты даму, азық-түлік қауіпсіздігі, су ресурстарын тиімді басқару, сондай-ақ көлік және энергетикалық өзара байланыстылық салаларындағы ынтымақтастық бағыттарына арналған аналитикалық жылдық есептері негізінде пленарлық отырыс өтеді. Отырыс барысында Академия бастамасымен жүргізілген жобалардың жетекші сарапшылары зерттеу нәтижелерімен бөліседі.
